अमेरिकी राष्ट्रपति ट्रम्पद्वारा लगाइएका ट्यारिफहरू हटाउन बेलायतको यस्तो रणनीति
प्रकाशित मिति : चैत्र १९, २०८१ मंगलबार
अमेरिकी राष्ट्रपति डोनाल्ड ट्रम्पद्वारा लगाइएका ट्यारिफहरू छिट्टै हट्न सक्ने बेलायतले आशा राखेको छ । दुवै देश नयाँ आर्थिक साझेदारीमा सहमत भए अमेरिकी राष्ट्रपति ट्रम्पद्वारा लगाइएका ट्यारिफहरू छिट्टै हट्ने बेलायतले आशा राखेको हो ।
बेलायतका व्यापार मन्त्री जोनाथन रेयोल्ड्सले मंगलबार अमेरिकासँगको वार्ता सकारात्मक दिशामा अघि बढिरहेको बताएका छन् ।
बेलायतले ट्रम्पको ट्यारिफ योजनाबाट बच्न प्रविधि र कृत्रिम बुद्धिमत्ताजस्ता क्षेत्रमा अमेरिकासँग सहकार्य गर्ने प्रस्ताव राखेको थियो। तर, मन्त्री रेयोल्ड्सले ट्रम्पले सबै देशहरूमाथि शुल्क लगाउने रणनीति अपनाएको र त्यसपछि मात्रै व्यक्तिगत छुटबारे छलफल गर्न चाहेको बताएका छन् ।
मन्त्री रेयोल्ड्सले भने, ‘ट्रम्पले सबै देशहरूमाथि शुल्क लगाउने रणनीति अपनाएका छन् । त्यसपछि मात्रै व्यक्तिगत छुटबारे छलफल गर्न चाहन्छन्।’
उनले बुधबार घोषणा हुने भनिएका ती शुल्कहरू हटाउनका लागि दुवै पक्षले समझदारी गर्नु जरुरी रहेको बताए । उनले नयाँ सम्झौताका लागि रूपरेखा तयार गरिसकेको र मुख्य सर्तहरूमा सहमति भई विस्तृत छलफल अगाडि बढ्न सक्ने समेत जिकिर गरे ।
उनले भने, ‘बुधबार घोषणा हुने भनिएका ती शुल्कहरू हटाउनका लागि दुवै पक्षले समझदारी गर्नु जरुरी छ। हामी नयाँ सम्झौताका लागि रूपरेखा तयार गरिसकेका छौँ, जसअनुसार मुख्य सर्तहरूमा सहमति भई विस्तृत छलफल अगाडि बढ्न सक्छ।’
ब्रिटेनका प्रधानमन्त्री कीर स्टार्मरले पनि वार्ताहरू सकारात्मक रूपमा अघि बढिरहेको बताएका छन्।
युरोपेली सङ्घ र अन्य प्रमुख अर्थतन्त्रहरूले अमेरिकी ट्यारिफहरूको जवाफमा कठोर कदम उठाए पनि ब्रिटेनले त्यस्तो प्रतिरोध नगरीकन कूटनीतिक वार्ताको माध्यमबाट समाधान खोज्ने नीति अपनाएको छ।
मन्त्री रेयोल्ड्सले भने, ‘ब्रिटिस व्यवसायहरूले हाम्रो शान्त पूर्ण दृष्टिकोणलाई समर्थन गरेका छन्, जसले समस्या बढाउनुको सट्टा समाधान खोज्न प्राथमिकता दिनेछ।’