अमेरिकामा आँधीका कारण मृत्यु हुनेको संख्या १६ पुग्यो, सबैभन्दा धेरै मृत्यु टनेसीमा
प्रकाशित मिति : चैत्र २४, २०८१ आईतबार
अमेरिकामा आँधीका कारण मृत्यु हुनेको संख्या १६ पुगेको छ । मध्य–पूर्वी क्षेत्रमा आएको आँधीबेहरीका कारण कम्तीमा १६ जनाको मृत्यु भएको अधिकारीहरूले जनाएका छन् ।
राष्ट्रिय मौसम सेवाले शनिबार आँधीको चेतावनी जारी गरेको थियो ।
अर्कान्सासदेखि ओहायोसम्म फैलिएको आँधीबेहरीले भवनहरूमा क्षति पुर्याएको, सडकहरू बाढीमय भएको र हालैका दिनहरूमा दर्जनौँ चक्रवात उत्पन्न भएका छन् ।
टेनेसी राज्यको पश्चिमी भागमा १० जनाको मृत्यु भएको राज्यका अधिकारीहरूले बताएका छन् ।
केन्टुकी राज्यका गभर्नर एन्डी बेशियरका अनुसार बाढीका कारण एक बालकसहित दुई जनाको मृत्यु भएको छ ।
आँधीका कारण कैयौँ राज्यमा व्यापक क्षति पुगेको, घरहरू भत्किएको, रुखहरु ढलेको, बिजुलीको तार ढलेको र कारहरु पल्टिएको देखिएको छ ।
आँधीका कारण मिसौरीमा दुई र इन्डियानामा एक जनाको मृत्यु भएको स्थानीय सञ्चारमाध्यम र अधिकारीहरूले जनाएका छन् ।
अर्कान्सास राज्यको लिटिल रकस्थित एक घरमा पाँच वर्षीय एक बालक मृत अवस्थामा फेला परेको राज्यको आपतकालीन व्यवस्थापन निकायले जारी गरेको विज्ञप्तिमा उल्लेख छ ।
अर्कान्सास र टेनेसीमा एक लाखभन्दा बढी ग्राहक विजुलीविहिन रहेको बताइएको छ ।
वैज्ञानिकहरूका अनुसार ग्लोबल वार्मिङले जलवायु परिवर्तन र पानीको चक्रलाई बिथोलिरहेको छ । गत वर्ष अमेरिकामा अधिक गर्मी भएको थियो ।
चक्रवात र विनाशकारी आँधीबेहरीको असर जलवायु परिवर्तनको मुख्य असर भएको विश्लेषकहरुले बताएका छन ।