टर्कीद्वारा सिरिया सरकारलाई कुर्द लडाकुहरुलाई नसघाउन चेतावनी, सीमामा हमला नगर्न टर्कीलाई सिरियाको चेतावनी
प्रकाशित मिति : फाल्गुन ७, २०७४ सोमबार
टर्कीले कुर्द लडाकुहरुलाई नसघाउन सिरिया सरकारलाई चेतावनी दिएको छ।
सिरियाका सरकारी सन्चारमाध्यमहरुले सरकार समर्थित मिलिसियाहरु अबको केहीघन्टाभित्रै देशको उत्तरमा कुर्दहरुको नियन्त्रणमा रहेको आफ्रिन इलाकामा प्रवेश गर्नलागेको जनाएपछि टर्की सरकारको त्यस्तो चेतावनी आएको हो।
टर्कीका विदेश मन्त्री मेभलुत काभुसोग्लुले उनको मुलुकका सैन्यलाई कसैले पनि रोक्न नसक्ने बताए।
उनले सिरियाली सैन्यले कुर्द लडाकुहरुलाई सघाए पनि आफ्ना सैन्यले कुर्दहरु विरुद्धको कारवाही जारी राख्ने चेतावनी पनि दिए।
टर्कीबाट भैरहेको अतिक्रमण रोक्न कुर्द लडाकुहरुलाई सघाउन सिरिया सहमत भएको भन्ने बताइँदै गर्दा टर्कीको त्यस्तो भनाइ आएको बिबिसीले जनाएको छ।
यसअघि सिरियास्थित कुर्द अधिकारीहरुले टर्कीको सैनिक अतिक्रमणसंग जुध्न सिरिया सरकारले उनीहरुलाई मदत गर्न लागेको बताएका थिए।
टर्कीले आफ्नो सीमा पारी आफ्रिन इलाकामा रहेका कुर्द लडाकुहरुलाई आतंककारी भन्ने गर्दछ।
उसले उनीहरुलाई त्यहाँबाट धपाउन गत महिना आफ्ना सैनिकहरुलाई सिरियाली भूभागमै पठाएको थियो।
