एशियाका सबैभन्दा धनी अर्बपती को ?
प्रकाशित मिति : भाद्र १८, २०७५ सोमबार
बीबीसी
एशिया महाद्वीपको तुलनामा उत्तरी अमेरिका र युरोपलाई सधैं सम्पन्न मानिन्छ । तर पछिल्लो महिना एउटा फिल्म रिलिज भयो ‘क्रेजी रिच एशियन्स’ । यी फिल्मले यस्तो धारणा धेरै हदसम्म परिवर्तन गर्न सफल रह्यो । एशियामा धनीको संख्या कसरी वृद्धि भइरहेको छ, उक्त फिल्मले देखाएको छ ।
सिंगापुरमा आधारित यो फिल्ममा शानदार सपिङ मल देखाइएको छ जसमा संसारभरीका महँगा ब्रान्डका सामान राखिएका छन् ।
हुन त यो वास्तविकता फिल्मी पर्दामा मात्र सिमित छैन । च्यारिटी संस्था अक्सफेम अनुसार एशिया–प्रशान्त क्षेत्रमा धनीहरुको संख्या उत्तरी अमेरिका र युरोपभन्दा धेरै भएको छ ।
यो महाद्वीपमा संसारभरीका करोडपती र अर्बपतीको बसोबास छ ।
साथै, एशिया महाद्वीप संसारभरीको दुई–तिहाई गरिब कामदारको घर पनि हो ।
फोर्ब्स म्यागजिनका अनुसार मेगा रिच अर्थात् अत्यधिक धनीको संख्यामा अहिले पनि अमेरिका सबैभन्दा उच्च स्थानमा छ । त्यहाँ लगभग पाँच सय ८५ करोडपति छन् । तर एशिया महाद्वीपको प्रमुख देश चीन पनि अब अमेरिकाभन्दा धेरै पछि छैन । चीनमा करोडपतिको संख्या तीन सय ७३ छ ।
यस्तै, यदि एशियाको सबै देशका करोडपतिलाई मिलाउने हो भने यो संख्या ६ सय पुग्छ जुन अमेरिकाभन्दा धेरै हुन्छ । यो जानकारी अक्सफेममार्फत सूसी ग्लोबल वेल्थ डेटाबुक सन् २०१७ मा भएको आँकडाको विश्लेषणपछि दिइएको हो ।
सन् २००८ देखि २०१२ बीच चीनको वार्षीक विकास दर ८ प्रतिशतदेखि ११ प्रतिशतको बीचमा रह्यो जबकी यसै क्रममा अमेरिका र युरोपमा आर्थिक संकट बनेको थियो ।
न्यूयोर्कमा केपजेमिनी कम्पनीमा मार्केट इन्टेलिजेन्सका उप–प्रमुख चिराग ठकराल यसबारे भन्छन्, ‘चीन र भारतजस्ता ठूला देशमा जुन प्रकारको बजार बिस्तार भएको छ, यसले पछिल्लो केही वर्षमा यो पूरा इलाकाको आर्थिक तन्त्र बलियो भएको छ । यसका साथै, जापान, हंगकंग र सिंगापुरजस्ता देशमा पनि बजार विकसित भएको छ ।’
एशियाका धनी को हुन् ?
एशियाका सबैभन्दा धनी व्यक्ति पोनी मा भनिने हुआतेंग हुन् । फोर्ब्सको सन् २०१८ मा जारी गरिएको सूची अनुसार उनी संसारको १७ औं धनी व्यक्ति हुन् ।
पोनी मा चीनको सबैभन्दा ठूलो टेक कम्पनी टेसेन्ट होल्डिंग्सका मुख्य कार्यकारी हुन् । यो कम्पनीसँग विच्याटजस्ता प्रमुख मेसेजिङ एपको स्वामित्व छ । पोनी मासँग कूल चार हजार पाँच सय ३० करोड डलरको सम्पत्ति छ ।
फोर्ब्सको सूचीमा समावेश शीर्ष २० करोडपतीमा अलीबाबा कम्पनीका प्रमुख ज्याक मा पनि समावेश छन् । उनको कूल सम्पत्ति तीन हजार ९ सय करोड डलर छ ।
यस्तै, शीर्ष ३० मा हंगकंगका ली का–शिंग र चीनका वांग जिआनलिन समावेश छन् ।
यदि एशिया महाद्वीपको अलग–अलग देशमा सन् २०१५ को तुलनामा सम्पत्तिमा आएको वृद्धिको प्रतिशत हेर्दा इन्डोनेशियामा सबैभन्दा धेरै १४.३ प्रतिशत र थाइल्याण्डमा १३.३ प्रतिशतको वृद्धि दर्ता गरिएको छ ।
चीनमा यो ९.८ प्रतिशत छ ।