जापानमै रहेका श्रीमान बेपत्ता, श्रीमतिद्धारा खोजिदिन आग्रह
प्रकाशित मिति : कार्तिक १४, २०७५ बुधबार
विगत ८ बर्षदेखि जापानमा बसिरहेका रुपन्देही सैनामैना ४ का वुद्धिसागर गौतम जापानमा हराएका छन् ।
श्रीमतिसहित हाल चिवा केनको मिनामी ग्योतोकुमा बस्दै आएका गौतम यही अक्टोबरको ११ तारिकदेखि हराईरहेका र उनलाई देख्नुहुने महानुभावहरुले सम्पर्क गरिदिनु हुन श्रीमती गंगा गौतमले जापानबासी सबै नेपालीहरुसंग आग्रह गरेकी छन् ।
उनले श्रीमान हराएको दुई हप्ता बितिसक्दा पनि अहिलेसम्म केहि पत्ता लागेको नलाग्दा मनमा चिसो पसेको बताइन । कहि कतै देख्नुहुने महानुभावले यथासिघ्र सम्पर्क गर्नुहुन उनले अनुरोध समेत गरेकी छन् ।
११ तारिकको बेलुकी श्रीमती कामबाट फर्कंदा उनी कोठामा थिएनन् ।केहीदिन साथिभाईकोमा गएको ठानि बाटो हेरेर आफन्त तथा चिनेजानेकोमा खवर गरेपनि केही जानकारी नपाएपछि आफुले पाँचौं दिन प्रहरी बिटमा गएर रिपोर्ट लेखाएको गंगाको भनाई छ । करिब ८ वर्ष अगाडि जापान आएका वुद्धिसागर विगत ५ वर्षदेखि श्रीमती गंगासँगै जापानमा बस्दै आएका थिए । नेपालमा उनको आमा, १२ र ३ वर्षको दुई छोरा छन् । उनले आफ्नो फोन पनि घरमा नै छाडेर गएका छन् भने पासपोर्ट पनि सँगै लगेका छैनन् ।
बेलाबखत सामान्य घरायसी बिवाद हुँदा जापानमा कसैले थाहा नपाउने ठाउँमा गएर बस्छुु भन्ने गरेका बुद्धिसागर पछिल्लो केही महिना यता भिसामा समस्या रहेकाले तनाबमा रहेको श्रीमती गंगाको भनाई छ ।
नोभेम्बर ६ तारिखमा भिसा सकिने भएकाले सोही मितिमा नेपाल फर्कनको लागि दुईवटा हवाई टिकट समेत बुकिगं गराईसकेका बुद्धिसागरले टिकट भने नलिइसकेको बुझिएको छ ।
उनकी श्रीमतीका अनुसार बैंकको च्यूचो भने उनले साथैमा लिएर गएका थिए । तर उनले उक्त च्यूचो पनि ग्योतोकु नजिकैको सुपरमार्केटमा खसालेको र प्रहरीले श्रीमतीलाई खबर गरेर बुझाएको बताइएको छ ।
अरुसंग लिन र दिन बाँकी पैसा पनि कापिमा लेखेर छोडेको पाएपछि श्रीमतिले आफुलाई डर लागेको बताइन ।
उनलाई देख्नुहुनेहरुले सम्पर्क नम्बर ०८०६५१०४०४१ श्रीमती र ०८०–३६०८–७४४२ मा रामजी गौतमलाई सम्पर्क गर्न अनुरोध गरिएको छ ।
