नेपालका शिक्षक – अमेरिकामा सेफ, स्वादिष्ट नेवारी खानाका साथमा काठमाडौं किचन
प्रकाशित मिति : मंसिर १३, २०७५ बिहीबार
टिकापुर कैलालीका जीवन बम । नेपालमा शिक्षक थिए, त्यो पनि एकाउन्टेन्टका । नोबल एकेडेमी र शुभश्री एकेडेमीमा प्लस टुका विद्यार्थीहरुलाई पढाउँथे । तर अमेरिकामा आइसकेपछि भने उनी सेफ भएका छन्, खाना पकाउने । नेपालमा चक डस्टरमा रमाउने उनी अहिले किचनमा रमाउँछन् ।
काठमाडौंको त्रिभुवन विश्वविद्यालयबाट फाइनान्समा एमबीए गरेका थिए उनले । कम्पनी कर्पोरेटमा स्नातक पनि गरेका थिए बमले । त्यसपछि उनीभित्र अमेरिकाको भूत सवार भयो । त्यसैले १७ बर्ष अगाडि अमेरिका आए, विद्यार्थी भिसामा । एकबर्ष अध्ययन गरिसकेपछि उनले आफ्नो स्टाटस परिवर्तन गरिदिए । अनि रमाउन थाले किचनमा ।
अमेरिका आइसकेपछि उनको जीवनमात्र परिवर्तन भएन, पेशा पनि परिवर्तन भयो । उनले न्युयोर्कको लङ आइल्याण्डमा रहेको कुलिनरी एकेडेमीबाट प्रोफेशनल कुकिङमा ग्रयाजुएट गरे । त्यसपछि लङ आइल्याण्डमा नै तन्दुर किचनमा सेफका रुपमा कैयन बर्ष काम गरे । पछि सन् २००६ तिर न्युयोर्कको क्राउन प्लाजा होटलमा उनले कन्टिनेन्टल खानाको सेफका रुपमा काम सुरु गरे र झण्डै ८ बर्ष त्यहाँ काम गरे ।
त्यही काम गर्दा गर्दै उनले सन् २०१२ मा न्युयोर्कको ज्याक्सनहाइटमा फ्रेण्डस् कर्नर नामको रेष्टुरेण्ट खोले । अहिले त्यो रेष्टुरेण्ट उनको एकल लगानीमा संचालित छ । रेष्टुरेण्ट राम्रो चलेपछि उनले क्राउन प्लाजाको जागिर छाडे । ज्याक्सनहाइटमा नै तिब्बती पार्टनरसँग मिलेर स्पाइसी टिबेट नामको अर्को रेष्टुरेण्ट खोले । पछि एनआरएन सर्भिसेज खोले ज्याक्सनहाइटमा नै । अहिले त्यसमा पनि उनको एकल लगानी छ ।
रेष्टुरेण्ट पेशाबाट हौसिएका उनले गतबर्षको डिसेम्बरमा उडसाइडमा पार्टनरसँग मिलेर काठमाडौं फ्युजन किचन खोले । अहिले यो पनि उनको एकल लगानीमा संचालित छ ।
काठमाडौंमा अध्ययनका क्रममा समेत कहिले किचनमा छिरेनन् उनी । किचनमा काम गर्ने छुट्टै मान्छे राखेका थिए । जीवनमा कहिलेपनि खाना पकाउने लाइनमा छिर्छु भन्ने कल्पना नै गरेका रहेनछन् उनले । उनी भन्छन् – ‘तर अमेरिकामा जब रेष्टुरेण्टको किचनमा छिरें । तब निकै मज्जा आयो । म किचनमा निकै रमाउन थालें ।’
अमेरिका आइसकेपछि किचनमा रमाउन थालेका उनलाई झण्डै १६ बर्षदेखि किचनबाट बाहिर निस्कनु परेको छैन । १६ बर्ष लामो अनुभवबाट उनले आफ्नै लगानीमा रहेको उडसाइडमा रहेको काठमाडौं फ्युजन किचनमा सेफका रुपमा समेत काम गर्छन् । एकजना नेवारी सेफको मद्दतबाट उनले काठमाडौं फ्युजन किचनमा स्वादिष्ट नेवारी खाना उपलब्ध गराउन थालेका छन् । उनी भन्छन् -‘न्युयोर्कमा अथेन्टिक नेवारी खाना नभएको नेवार साथीहरुबाटै गुनासो आयो । त्यसैले हामीले अथेन्टिक नेवारी खाना उपलब्ध गराउन सुरु गरेका छौं ।’
रेष्टुरेण्टमा समयबजी, बारा, चटामरी लगायतका नेवारी खानाहरु उपलब्ध छन् । पाटनकै शैलीमा समयबजी उपलब्ध गराउने गरेको उनको भनाई छ । रेष्टुरेण्टमा नेवारी बाहेक नेपाली, भारतीय र तिब्बती खानापनि उपलब्ध रहेको छ ।
काठमाडौं फ्युजन किचनमा उपलब्ध केही स्वादिष्ट परिकार । फोटो : खसोखास
