नक्कली डकुमेन्ट पेश गरि भिसा लिने १ जापानी सहित ५ नेपाली पक्राउ
प्रकाशित मिति : फाल्गुन ४, २०७५ शनिबार
किर्ते कागजात पेश गरी भिसा नविकरण गरेको आरोपमा १ जापानी नागरिक सहित ५ जना नेपालीहरुलाई प्रहरीले नियन्त्रणमा लिएको छ ।
भिसा एप्लाई गर्दा गलत कागजात पेश गरेको अभियोगमा ५ नेपाली महिला र पुरुष पक्राउ परेको अल निप्पोन न्यूज नेटवर्कमा प्रसारित समाचारमा उल्लेख गरिएको छ । समाचार अनुसार टोकियो महानगरिय प्रहरीले उनिहरुलाई अबैध रुपमा जापान बसेको आरोपमा पक्राउ गरेको हो ।
यसमा सहयोग गर्ने एक जापानी समेत पक्राउ परेका छन् । समाचार अनुसार पक्राउ परेका नेपालीहरुलाई गलत कागजात बनाएर भिषा लगाउन सहयोग गर्दै आएका ५७ बर्षिय इसाओ हायासाकाका नाम गरेका एक जापानी नागरिकलाई समेत पक्राउ गरिएको छ । उनी बिदेशी कामदारहरुलाई जापानमा काम लगाईदिने (हाकेन) कम्पनीमा कार्यरत पूर्व कर्मचारी भएको बताइएको छ ।
पक्राउ परेका ५ नेपालीहरुबारे विस्तृत जानकारी नदिइएपनि उनीहरुले हरुले गत बर्ष भाषा अनुवादक, अनुवाद गर्ने कामको लागि भिषा पाएका थिए तर काम भने गोदाममा गर्दै आएको समाचारमा उल्लेख छ ।
महानगरिय प्रहरीका अनुसार हासायाकाले गत वर्षको मे महिनामा ती नेपाली युवा युवतीको भिसा नविकरणका लागि किर्ते कागजात बनाउन सहयोग गरेका थिए ।
गलत कागजात बनाएर भिषा लगाईदिने काम गर्दै आएका जापानी नागरिकले उनिहरुसँग मोटो रकम लिने र उनिहरुलाई काम लगाईदिने कम्पनीबाट समेत रकम लिइ तीन बर्षको बिचमा करिब एक करोड येन भन्दा बढि यस्तो कामबाट कमाएको प्रहरीको अनुमान छ ।
हासायाकाले कम्पनीहरुलाई विदेशी कामदारहरु उपलब्ध गराएबापत ती कम्पनीहरुबाट कामदारहरुको तलवको ३० प्रतिशतले हुन आउने कमिशन रकम प्राप्त गर्दै आईरहेका थिए ।
कुटपिटमा संलग्न भएको आरोपमा पक्राउ परेका ५ नेपाली युवाहरुको घटना सेलाउन नपाउँदै जापानमा फेरि अर्का ५ नेपालीहरु पक्राउ परेको खबर सार्वजनिक भएको हो ।
