पोर्तुगलमा कोरोना संक्रमित नेपालीको संख्या १९ पुग्यो,थप ८ नेपालीलाई संक्रमण
प्रकाशित मिति : चैत्र २१, २०७६ शुक्रबार
पोर्तुगलमा आज थप आठजना नेपालीलाई कोरोना संक्रमण पुष्टि भएको छ ।
लिस्बनबाहिर सान्तराइको एउटा कम्पनीमा काम गर्ने आठ नेपालीलाई कोभिड १९ संक्रमण भएको एक संक्रमितले बताएका छन् । उनीहरुलाई जुनता दे फ्रेगेजियाको हलको क्वारेन्टाइन शिविरमा राखिएको छ ।
उनले आफूहरुको स्वास्थ्य स्थिति सामान्य रहेको तर टेष्ट गर्दा पोजिटिभ देखिएकोमा दु:ख लागेको बताए । ‘हामीलाई केही भएको छैन । तर परिक्षण गर्दा कोरोना पोजिटिभ भएको नतिजा आएको छ’ उनले भने, ‘जुन्ताको हलमा राखेको छ । खाना बस्न ठिकै छ ।’
यता लिस्बनको कुरी काब्राल अस्पातलमा उपचार गराइरहेका तीनजनालाई पनि संक्रमण पुष्टि भएको छ । उनीहरुले स्वास्थ्य स्थिति सामान्य रहेको उल्लेख गरेका छन् ।
यसअघि पोर्तुगलको लिस्बनमा सातजना नेपालीलाई कोरोना संक्रमण भएको छ । अवस्था गम्भिर भएका कारण दुईजनालाई अस्पतालमा भर्ना गरिएको छ । पाँचजनालाई घरमै क्वारेन्टाइनमा राखिएको छ ।
यसअघि कोरोना संक्रमण भएका एकजना नेपालीको फारो अस्पतालमा उपचार भइरहेको छ ।