भारतबाट नेपाल आएका एक व्यक्तिमा कोरोनाको संक्रमण,उनी कोरोनाको सातौं संक्रमित
प्रकाशित मिति : चैत्र २१, २०७६ शुक्रबार
कास्की । भारतबाट आएका एक व्यक्तिमा कोरोनाको संक्रमण देखिएको छ । मध्यपूर्व, चीन र युरोपियन देशबाट आएकामा देखिदै आएको कोरोना भारतबाट आएकोमा पनि भेटिएको हो ।
कास्कीमा भेटिएका व्यक्ति नेपालमा कोरोनाका सातौं संक्रमित हुन् । कोरोनाको छैटौं संक्रमित फेला परेको भोलिपल्टै भारतबाट फर्किएका व्यक्तिमा कोरानाको संक्रमण देखिएको हो ।
पोखरा स्वास्थ्य विज्ञान प्रतिष्ठानले गरेको परीक्षणमा कोरोनाको संक्रमण पोजेटिभ देखिएको गण्डकी प्रदेश सरकारले जनाएको छ ।
पहिलोपटक परीक्षण गर्दा रिपोर्ट पोजेटिभ आएको छ, अब थप दुई परिक्षण हुने चिकित्सकले जनाएका छन्।
यसअघी सार्वजनिक भएका दोस्रो, तेस्रो र छैटौं संक्रमित चैत ४ गते दोहाबाट कतार एयरवेजको एउटै विमानबाट नेपाल आएका थिए । सुरुमा चैत १० गते काठमाडौंकी १९ वर्षकी युवतीमा संक्रमण देखिएको थियो भने त्यसपछि विमानमा आएकाहरुको खोजी गर्दै परीक्षण गर्ने क्रममा बागलुङकी १९ वर्षीया किशोरीको पोजेटिभ रिपोर्ट आएको थियो । चीनबाट आएका व्यक्ति पहिलो संक्रमित थिए। उनी निको भएर गइसकेका छन्।
त्यसको चार दिनपछि उनीहरुसँगै आएकी ६५ वर्षीया वृद्धामा कोरोना संक्रमण भेटिएको भोलिपल्ट भारतबाट आएका अर्का व्यक्तिमा पनि कोरोना पोजेटिभ पुष्टि भएको छ ।