खसोखास आजदेखि १० बर्षमा प्रवेश
प्रकाशित मिति : माघ २, २०७७ शुक्रबार
न्युयोर्कबाट प्रकाशित हुँदै आइरहेको खसोखास आजेदेखि १० बर्षमा प्रवेश गरेको छ । खसोखास सन् २०१२ को जनवरी १५ देखि साप्ताहिक रुपमा प्रकाशन आरम्भ भएको थियो ।
सन् २०१३ को मे ३ देखि प्रेस स्वतन्त्रता दिवशको अवशर पारेर खसोखासले आफ्नै अनलाइन संस्करण खसोखास डटकम सुरुवात गरेको थियो । साथै साप्ताहिक पत्रिकाको नाम समेत परिवर्तन गरेर खसोखास साप्ताहिक बनाएको थियो । त्यसैदिनदेखि दैनिक वेवपत्रिका समेत सुरुवात गरेको थियो ।
त्यो यता खसोखास निरन्तर रुपमा साप्ताहिक ट्वाबलोइड पत्रिका र अनलाइनका रुपमा प्रकाशन हुँदै आएकोमा सन् २०१७ देखि साप्ताहिक म्यागजिनका रुपमा प्रकाशन गरिएको थियो ।
विगतमा लुम्बिनी इन्टरनेशनल इन्कले प्रकाशन गर्दै आएको खसोखास सन् २०१८ को जनवरीदेखि नमस्ते मिडिया इन्कले प्रकाशन गर्दै आएको छ ।
खसोखासले सुरुवातदेखि नै अमेरिकामा रहेको नेपाली समुदायका चासोको विषयहरु र इमिग्रेशनलाई महत्व दिंदै आएको छ । कोरोनाको महामारीमा कोरोना भाइरस श्रोत केन्द्र नै संचालन गरेको खसोखासले अमेरिकी राजनीतिलाई पनि प्राथमिकता दिदै आएको छ ।
खसोखास १० बर्षमा प्रवेश गरेको अवशरमा प्रकाशक तथा प्रधानसम्पादक किशोर पन्थीले खसोखासका पाठक, विज्ञापनदाता, शुभचिन्तक, सहयोगी लगायत सबैलाई धन्यवाद दिएका छन् ।
खसोखास ‘खसोखास डटकम’का अतिरिक्त गुगल बुक्स र गुगल न्युजमा पनि उपलब्ध छ ।