कांग्रेस नेता जोशीको पशुपति आर्यघाटमा अन्त्येष्टि
प्रकाशित मिति : चैत्र १४, २०७७ शनिबार
नेपाली कांग्रेसका नेता नविन्द्रराज जोशीको शनिबार अन्त्येष्टि गरिएको छ। मस्तिष्कघातका कारण शुक्रबार राति ८.२४ बजे नर्भिक अन्तर्राष्ट्रिय अस्पतालमा निधन भएका नेता जोशीको पशुपति आर्यघाटमा अन्त्येष्टि गरिएको हो। स्व जोशीकाे पार्थिव शरीरमा उनका दाजु राजुराज जोशी र भतिजा सौरभ जोशीले दागवत्ती दिएका थिए।
अन्त्येष्टिपूर्व जोशीको शवलाई श्रद्धाञ्जलीका लागि उनको निजी निवास यट्खाटोल र कांग्रेस केन्द्रीय कार्यालय सानेपामा राखिएको थियो। सानेपामा जोशीको पार्थिव शरीरलाई कांग्रेस सभापति शेरबहादुर देउवाले पार्टीको झण्डा ओढाएर श्रद्धाञ्जली व्यक्त गरेका थिए।
जोशीलाई श्रद्धाञ्जली दिन सभामुख अग्निप्रसाद सापकोटा, माओवादी केन्द्रका अध्यक्ष पुष्पकमल दाहाल ‘प्रचण्ड’ नेकपा (एमाले) का नेता एवं पूर्वप्रधानमन्त्री माधवकुमार नेपाल, एमाले संसदीय दलका उपनेता सुवासचन्द्र नेम्वाङ, माओवादी केन्द्रका नेता नारायणकाजी श्रेष्ठ, अर्थमन्त्री विष्णुप्रसाद पौडेल, परराष्ट्रमन्त्री प्रदीपकुमार ज्ञवालीलगायत कांग्रेस पार्टी कार्यालय सानेपा पुगेका थिए।
२०१९ असार ३ गते काठमाडौँमा जन्मिएका नेता जोशी नेपाल विद्यार्थी सङ्घका पूर्वमहामन्त्री, काठमाडौँ महानगरपालिकाको पूर्वउपमेयर, २०६४ र २०७० सालमा काठमाडौँ ८ बाट संविधानसभाको निर्वाचनमा निर्वाचित भएका थिए।
नेपालको लोकतान्त्रिक आन्दोलनमा चार दशकभन्दा लामो समय अनवरत सङ्घर्षरत अथक योद्धा स्व जोशी राजनीतिलाई सँधै जनताको सेवा गर्ने भावना र अवसरका रुपमा लिने सरल, बौद्धिक र क्षमतावान नेताका रुपमा परिचित थिए।
मस्तिष्कघात हुनुभन्दा पहिले स्वर्गीयजोशी आफ्नो निर्वाचन क्षेत्रको घरघरमा पुगेर कोरोनाको सामग्री वितरण गर्दै आएका थिए। २०७३ सालमा उद्योगमन्त्री बनेका जोशी नेपाली कांग्रेसको १२ औँ र १३औँ महाधिवेशनमा निर्वाचित केन्द्रीय सदस्य बनेका थिए। स्वर्गीय जोशीका श्रीमती र एक छोरी छन्।