असार १७ गतेदेखि नेपालमा आन्तरिक उडान शुरु हुने
प्रकाशित मिति : असार ९, २०७८ बुधबार
कोरोनाको महामारीका कारण विगत दुई महिनादेखि अवरुद्ध आन्तरिक हवाइ उडान असार १७ गतेदेखि संचालन हुने भएको छ । संस्कृति, पर्यटन तथा नागरिक उड्डयन मन्त्रालयले असार १७ गतेबाट आंशिक रुपमा हवाई सेवना शुरु गर्ने जानकारी दिएको हो ।
यात्रु क्षमता ५० प्रतिशतले नबढ्ने गरी सञ्चालन गर्न दिने निर्णय भएको मन्त्रालयले जनाएको छ । बुधवार नेपाल नागरिक उड्डयन प्राधिकरणलाई विभिन्न वायुसेवा कम्पनीहरुलाई दुईतर्फी उडान स्वीकृति प्रदान गर्ने विषयमा पत्राचार गरेको हो ।
उडानका लागि खुला गरिएका गन्तव्यहरुको विवरण भने स्वास्थ्य तथा जनसङ्ख्या मन्त्रालयको सिफारिशतमा तोकिने भएको छ । नागरिक उड्डयन प्राधिकरणले उडान समय तालिका र उडान संख्या निश्चित गरे लगत्तै आन्तरिक उडान गर्दै आएका बुद्ध, श्री, यती, सौर्य, सीता, समिट, तारा, गुण लगायत वायुसेवा कम्पनीले टिकट बिक्री सुरु गर्ने भएका छन् ।
सुरुका दिनमा काठमाण्डौंबाट लगभग ३० देखि ३५ वटा उडान हुने जनाइएको छ । निजी वायुसेवा कम्पनीले तत्कालै उडान कार्यतालिकाका लागि आवेदन दिन सक्नेछन् ।
सोमवारको मन्त्रिपरिषद्को बैठकले आन्तरिक उडान खोल्नेबाहेक लकडाउनका कारण प्रभावित बनेको अन्तर्राष्ट्रिय उडानको सङ्ख्या पनि वृद्धि गर्ने निर्णय गरेको थियो।त्यसमा काठमाण्डौंबाट दोहामा सातामा चारवटा, इस्तानबुलमा सातामा दुईवटा, दुबईमा सातामा चारवटा र दमाममा सातामा दुईवटा उडान गर्ने भनिएको छ।
त्यसबाहेक कुवेत सिटीमा हप्तामा दुईवटा उडान, मस्कटमा एउटा, क्वालालम्पुरमा चारवटा, सोल तथा टोकियोमा एक-एकवटा उडान गर्ने भनिएको छ। चीनको छेङ्दु र ग्वाङ्जाओमा हप्ताको दुई-दुईवटा उडान गर्ने प्रधानमन्त्री तथा मन्त्रिपरिषद्को कार्यालयबाट प्रेषित गरिएको पत्रमा उल्लेख छ।
अन्तर्राष्ट्रिय उडान तालिकाका लागि नेपाल वायुसेवा निगम र अरू विदेशी विमानसेवाले पनि निवेदन दिनुपर्ने जनाइएको छ ।