अमेरिकी राष्ट्रपतिद्वारा आयोजित शिखर सम्मेलनमा प्रधानमन्त्री देउवालाई निम्तो, सम्बोधन आज साँझ गरिँदै
प्रकाशित मिति : मंसिर २३, २०७८ बिहीबार
प्रधानमन्त्री शेरबहादुर देउवाले आज साँझ अमेरिकी राष्ट्रपतिद्वारा आयोजित एक शिखर सम्मेलनमा सम्बोधन गर्नुहुने भएको छ । अमेरिकी राष्ट्रपति जो बाइडेनले आयोजना गर्न लागेको लोकतन्त्रसम्बन्धी शिखर सम्मेलनलाई प्रधानमन्त्री देउवाले भर्चुअल माध्यमबाट सम्बोधन गर्नुहुने जनाइएको छ ।
सम्मेलनमा देउवाले लोकतान्त्रिक मूल्य र मान्यतामा आधारित शासन प्रणालीप्रति नेपालको तर्फबाट प्रतिबद्धता जनाउँदै लोकतन्त्र तथा मानवअधिकार र महिला अधिकारको रक्षाका लागि नेपालले चालेका कदमबारे जानकारी गर्नुहुनेछ ।
विश्वभरबाट ११० मुलुकले भर्चुअल माध्यममार्फत उक्त सम्मेलनमा सहभागी हुने निम्तो पाएका छन् । जसमा नेपालको तर्फबाट प्रधानमन्त्री देउवासहित परराष्ट्रमन्त्री डा. नारायण खड्का, परराष्ट्र सचिव भरतराज पौड्याल, मुख्यसचिव शंकर दास बैरागी र परराष्ट्र मन्त्रालय एवं प्रधानमन्त्री तथा मन्त्रिपरिषद् कार्यालयका वरिष्ठ अधिकारी सहभागी हुने जनाइएको छ ।
तर छिमेकी देश चीनले भने यस शिखर सम्मेलनलाई अमेरिकाको प्रजातन्त्रको नाममा गर्न लागिएको नक्कली जमघट को रूपमा टिप्पणी गरेको छ ।