युरोपमा थप सेना पठाउने अमेरिकी सरकारको निर्णय
प्रकाशित मिति : माघ १९, २०७८ बुधबार
युक्रेनमा रुसको आक्रमणको बढ्दो आसंकाका कारण अमेरिकी राष्ट्रपति जो बाइडेनले युरोपमा थप सेना पठाउने निर्णय गरेका छन् ।
थप सेना पठाउन लागेको अमेरिकी रक्षा मन्त्रालय पेन्टागनले यो जानकारी दिएको हो ।
नर्थ क्यारोलिनाको फोर्ट ब्रागबाट पोल्याण्ड र जर्मनीमा दुई हजार सैनिक पठाइनेछ। जर्मनीमा रहेका एक हजार सैनिकलाई रोमानिया पठाइने भएको छ ।
तर रुसले भने आक्रमण गर्ने योजनालाई अस्वीकार गरेको छ, यद्यपि युक्रेनको सिमानामा १०,००,००० रुसी सेना तैनाथ गरिएको छ।
रुसले अमेरिकी सेना पठाउने निर्णयलाई “विपत्तिजनक” भनेको छ।
रुसले युक्रेनको दक्षिणी क्रिमिया प्रायद्वीपमा सन् २०१४ मे मा कब्जा गरेको थियो र अहिले आठ वर्षपछि दुई देशबीचको तनाव चरम सीमामा छ ।
रुसले युक्रेनी सरकारले मिन्स्क सम्झौता कार्यान्वयन नगरेको आरोप लगाएको छ । दुई देशबीच शान्ति स्थापना गर्न मिन्स्कमा अन्तर्राष्ट्रिय सम्झौतामा हस्ताक्षर भएको थियो। सन् २०१४ देखि दुई देशबीचको तनावमा कम्तिमा १४ हजार मानिसको मृत्यु भइसकेको छ ।
अमेरिकाले तैनाथ गरिएका अमेरिकी सेना युक्रेनमा लड्न नभई अमेरिकाका नाटो सहयोगीहरूको सुरक्षा सुनिश्चित गर्ने बताएको छ ।
यसअघि पेन्टागनले गत महिना युद्धको अवस्थामा युरोपलाई सहयोग गर्न साढे आठ हजार सैनिकलाई अलर्टमा राख्ने घोषणा गरेको थियो ।
