रुसले युरोपमा दोस्रो विश्वयुद्धपछि कै सबैभन्दा ठूलो युद्धको योजना बनाइरहेको बेलायती प्रधानमन्त्रीको चेतावनी
प्रकाशित मिति : फाल्गुन ८, २०७८ आईतबार
बेलायती प्रधानमन्त्री बोरिस जोनसनले युक्रेन र रुसबीच युद्ध जस्तो अवस्थाको बारेमा डरलाग्दो चेतावनी दिएका छन् । जोनसनले रुसी राष्ट्रपति भ्लादिमिर पुटिन दोस्रो विश्वयुद्धपछि युरोपमा सबैभन्दा ठूलो आक्रमणको तयारी गरिरहेको बताएका छन् । उनले पुटिनको योजना अब केही हदसम्म सुरु भएको संकेत पनि रहेको बताए ।
रुसले २८ लाख जनसंख्या भएको युक्रेनको राजधानी कीभलाई घेराउन बेलारुस हुँदै आक्रमण गर्ने तयारी गरिरहेको गुप्तचर रिपोर्टबाट यो थाहा भएको बेलायती प्रधानमन्त्रीले बताए ।
म्युनिख सुरक्षा सम्मेलनपछि बोरिस जोनसनले भने, ‘हामीले देखिरहेका योजना अनुसार यो सन् १९४५ पछिको युरोपमा सबैभन्दा ठूलो युद्ध हुनसक्छ।’ अमेरिकी राष्ट्रपति जो बाइडेनले रुसी सेनाले आगामी दिनमा युक्रेनमा आक्रमण गर्ने योजना बनाएको चेतावनी दिएका बेला जोनसनको बयान आएको हो । यसमा कीभलाई लक्षित गर्ने समावेश छ।
बोरिस जोनसनले यो युद्धमा रुस र युक्रेन दुवैका धेरै मानिस मर्नेछन् भन्ने कुरा जनताले बुझ्नुपर्ने बताएका छन् । उनले भने, सबै संकेत पुटिनले आफ्नो योजनामा काम गर्न थालेका छन्। उनले युक्रेनको पूर्वी क्षेत्रमा विद्रोहीको आक्रमण ठूलो क्र्याकडाउनको सुरुवात मात्र हुन सक्ने बताए।
यो इतिहासमा निर्णायक क्षण हो: कमला ह्यारिस
यसैबीच अमेरिकी उपराष्ट्रपति कमला ह्यारिसले शनिबार रुसले युक्रेनमा आक्रमण गरेमा “अभूतपूर्व” आर्थिक मूल्य चुकाउनु पर्ने चेतावनी दिएकी छन्। ह्यारिसले यस्तो आक्रमणले युरोपेली देशहरूलाई अमेरिकाको नजिक ल्याउनेबताईन । उनले युक्रेनका राष्ट्रपतिलाई भने, “यो इतिहासको निर्णायक क्षण हो।” जर्मनीमा आयोजित वार्षिक म्युनिख सुरक्षा सम्मेलनमा उपराष्ट्रपतिले यस्तो भनेकी हुन ।
“म स्पष्ट रूपमा भन्दैछु यदि रुसले युक्रेनमा आक्रमण गर्छ भने, अमेरिकाले आफ्ना सहयोगी र साझेदारहरूसँग अभूतपूर्व आर्थिक प्रतिबन्ध लगाउनेछ,” ह्यारिसले भनिन्। उपराष्ट्रपतिको उद्देश्य युरोपेली देशहरूलाई पश्चिमा देशहरूसँग ‘एकताबाट शक्ति’ छ भन्ने सन्देश दिनु हो।
उनले आफ्नो सम्बोधन मार्फत युरोपलाई सन्देश दिँदै भनिन् पश्चिमसँग “एकताको बल” छ र युक्रेनमा आक्रमणले रूसको ढोकामा नाटोको ठूलो उपस्थिति निम्त्याउन सक्छ। पछि, युक्रेनी राष्ट्रपति भोलोडिमिर जेलेन्स्कीसँगको भेटघाटको शुरुवातमा ह्यारिसलेभनिन् ‘यो इतिहासको एक परिभाषित क्षण हो।’ उनले जेलेन्स्कीलाई भने, ‘हामी तपाईंको देशमा हुने कुनै पनि खतरालाई गम्भीरताका साथ लिनेछौं।
यो हाम्रो भूमि हो, हामी शान्ति चाहन्छौं : युक्रेन राष्ट्रपति
यसबारे युक्रेनका राष्ट्रपतिले भने, ‘हामीले के भइरहेको छ भन्ने स्पष्ट बुझेका छौं। यो हाम्रो भूमि हो र हामी शान्ति चाहन्छौं।’ उनले थप सैन्य र आर्थिक सहायताको लागि अनुरोध गर्दै, पश्चिमी सहयोगीहरूले “विशेष कदम चाल्न” चाहन्छन् भने। जेलेन्स्कीले आफ्नो देशको सिमानामा रुसी सेना रहेको र युक्रेनको सेनाले वास्तवमा “पूरै युरोपको सुरक्षा” गरिरहेको कुरालाई जोड दिए। रुसले सन् २०१४ मा युक्रेनको क्रिमिया प्रायद्वीपलाई आफ्नो कब्जामा लिएको थियो र रुस समर्थित पृथकतावादीहरू देशको पूर्वी भागमा विगत आठ वर्षदेखि लडिरहेका छन्। एजेन्सी