बिदा मनाउन ओबामा इन्डोनेसिया
प्रकाशित मिति : असार १०, २०७४ शनिबार
अमेरिकाका पूर्वराष्ट्रपति बाराक ओबामा १० दिने विदा मनाउन इन्डोनेसिया आउनुभएको छ । उहाँ परिवारसहित इन्डोनेसियाको बाली आउनु भएको अधिकारीहरुले शनिबार जनाएका छन् । इन्डोनेसियामा ओबामाले बाल्यकाल बिताउनु भएको थियो ।
पूर्वराष्ट्रपति ओबामा उहाँका श्रीमती मिचेल र दुई छोरीसहित बालीमा रहेको टापुमा पुग्नु भएको सेनाका अधिकारीहरुले जनाएका छन् । “उहाँहरु गएराति अवेर आएर होटलमा बस्नुभयो । अनि ओबामा विहानै उठेर व्यायाम गर्नुभएको थियो,” स्थानीय सैन्य प्रमुखले भन्नुभयो ।
एकसाता बालीमा बसेपछि ओबामा परिवार योग्याकार्ता पुगेर त्यहाँको पुरानो मन्दिरको भ्रमण गर्ने जनाइएको छ । २ दिन त्यहाँ बिताएपछि उहाँहरु जाकार्ता जानुहुनेछ । ओबामाकी पारपाचुके गरेकी आमाले इन्डोनेशियनसँग विवाह गरेपछि ओबामाले सन् १९७० सम्म ४ बर्ष इन्डोनेशियामा बिताउनुभएको थियो । इन्डोनेशियाका राष्ट्रपतिको बारम्बारको निमन्त्रणापछि ओबामा बिदा मनाउन त्यहाँ जानुभएको हो ।
ओबामाले जुन ३० मा इन्डोनेशियाका राष्ट्रपतिलाई भेट्ने र भोलिपल्ट एउटा कार्यक्रममा सम्बोधन गर्ने जनाइएको छ ।