कसरी घट्यो कांग्रेस नेता डा. चन्द्र भण्डारी निवासमा ग्यास विस्फोटको घटना ?
प्रकाशित मिति : फाल्गुन ४, २०७९ बिहीबार
ग्यास सिलिन्डर विस्फोटबाट घाइते भएकी नेपाली कांग्रेसका नेता डा. चन्द्र भण्डारीकी आमा हरिकला भण्डारीको निधन भएको छ । हरिकलाको कीर्तिपुर अस्पतालमा उपचारको क्रममा आज बिहान निधन भएको हो ।
बिहीबार राति काठमाडौंको बुद्धनगरस्थित निवासमा सिलिन्डर पड्किँदा भण्डारी आमाछोरा गम्भीर घाइते भएका थिए । उनीहरुलाई राति नै कीर्तिपुर अस्पतालमा ल्याइएको थियो । अस्पतालका अनुसार डा. भण्डारीको अनुहार, दुबै हात र दुवै गोडाहरूमा गरी २५–३० प्रतिशल शरिर जलेको छ ।
भण्डारीको यथोचित उपचार नेपालमा सहज नहुने भन्दै अस्पतालले देशबाहिर सुविधा सम्पन्न स्वास्थ्य संस्थामा लैजान अस्पताले सिफारिस गरेको थियो । अस्पताले सिफारिस गरेबमोजिम भण्डारीलाई थप उपचारका लागि भारत लैजाने तयारी भइरहेको पुरा भइसकेको छ । भण्डारीलाई बिहीबार दिउँसो २ बजेपछि श्री एयरलाइन्सको विमानमार्फत मुम्बइ लगिँदै छ । उनको मुम्बईमा रहेको नेशनल बर्नस् सेन्टरमा उपचार गरिने सचिवालयले जनाएको छ ।
कसरी घट्यो भण्डारी निवासमा घटना ?
कांग्रेसका नेता भण्डारी गुल्मी क्षेत्र नं. १ बाट निर्वाचित प्रतिनिधि सभा सदस्य हुन् । उनी काठमाडौं–गुल्मी आउँजाउँ गर्न समस्या हुने भन्दै काठमाडौंको बुद्धनगरस्थित उनको भाइको घरमा बस्थे । बुद्धनगरको भाईको घरको तल्लो तलामा चन्द्र र उनकी आमा हरिकला बस्थे भने माथिल्लो तलामा भाइ हरिहरको परिवार बस्थ्यो ।
भण्डारी बुधबारको प्रतिनिधि सभाको बैठकपछि राजनीतिक भेटघाट, केही कार्यक्रम र अन्य केही काम सक्काएर राति साढे ९ बजे घर फर्किएका थिए । राति साढे १० बजेतिर ग्यास लीक भएको गन्ध आएपछि आमाले चन्द्रलाई बोलाएकी थिइन् । आमाले बोलाएपछि भण्डारीले के भएको रहेछ भनेर बत्ती बाल्न थालेका थिए । बत्ती बालेर हेर्न खोज्दा स्पार्क निस्केर फैलिएको ग्यासमा आगो सल्किएको र विस्फोट भएको काठमाडौं प्रहरी परिसरले प्रारम्भिक निष्कर्ष निकालेको छ । प्रहरीले अरू विषयमा हामी पनि अनुसन्धान गरिरहेको छ ।
ग्याँस लिक भएपछि आगो लागेको प्रहरीको प्रारम्भिक निष्कर्ष छ । सिलिन्डर भने विस्फोट नभएको पाइएको छ । आगलागीपछि विस्फोटले झ्यालका सिसा फुटेका छन् । आगलागीबाट भण्डारीका आमाले लगाएका सबै कपडा जलेर शरीरका विभिन्न भागमा गहिरो चोट घाउ लागेको थियो ।