दक्षिण कोरिया र जापानको बैठकअघि उत्तर कोरियाद्वारा ब्यालिस्टिक मिसाइल प्रहार
प्रकाशित मिति : चैत्र १, २०७९ बुधबार
उत्तर कोरियाले दक्षिण कोरिया र जापानका शीर्ष नेताहरुको शिखर वार्ता हुनुभन्दा केही घण्टा अगाडि नै इन्टरकन्टिनेन्टल ब्यालिस्टिक मिसाइल (आईसीबीएम) प्रक्षेपण गरेको छ ।
जापान र दक्षिण कोरियाका अधिकारीहरूले यो मिसाइल प्रक्षेपण भएको पुष्टि गरेका छन्। बिहीबार बिहान प्रहार गरिएको मिसाइल जापानबाट करिब एक हजार किलोमिटर पश्चिममा समुद्रमा खसेको थियो ।
दक्षिण कोरियाका जोइन्ट चिफ अफ स्टाफका अनुसार उत्तर कोरियाको पूर्वी तटबाट स्थानीय समय बिहान ७:१० मा मिसाइल प्रक्षेपण गरिएको थियो। जापानको रक्षा मन्त्रालयले यो क्षेप्यास्त्र ICBM भएको स्वीकार गरेको छ ।
पछिल्लो एक हप्तामा उत्तर कोरियाले गरेको यो चौथो मिसाइल प्रक्षेपण हो ।
कोरियाली प्रायद्वीप नजिक अमेरिका र दक्षिण कोरियाबीच जारी नौसेना अभ्यासको बीचमा उत्तर कोरियाले यो कदम चालेको हो । उत्तर कोरियाले धेरै पटक भनेका छन् , ‘उसले यस्तो चालबाजीलाई उक्साउने कामको रूपमा हेरेको छ।’
तर, दक्षिण कोरियाका राष्ट्रपति युन सुक–योलले यो मिसाइल प्रक्षेपणपछि अमेरिकासँगको यो संयुक्त अभ्यास जारी रहने बताएका छन् । बिहीबारको मिसाइल प्रक्षेपणपछि दक्षिण कोरिया र जापानले पनि आफ्नो राष्ट्रिय सुरक्षा परिषद्को बैठक बोलाउने घोषणा गरेका छन् ।