बेलायत, जर्मनी र क्यानाडाले पनि सुडानबाट दूतावासका कर्मचारी र नागरिकलाई स्वदेश फर्काउँदै
प्रकाशित मिति : बैशाख १०, २०८० आईतबार
बेलायत, जर्मनी र क्यानडाले पनि द्वन्द्वग्रस्त सुडानबाट आफ्ना नागरिकलाई स्वदेश ल्याउने व्यवस्था गरेको बताएका छन् ।
यस पहिले अमेरिका, साउदी अरबलगायतका विश्वका अन्य मुलुकले पनि सुडानबाट आफ्ना कर्मचारी र नागरिकलाई फिर्ता ल्याउन थालिसकेका छन् ।
बेलायतका विदेशमन्त्री जेम्स क्लेभरलीले सुडानबाट बेलायतले आफ्ना दूतावासका कर्मचारीलाई हटाएको र बेलायती नागरिकको सुरक्षा बेलायत सरकारको उच्च प्राथमिकता रहेको आइतबार बताउनुभएको छ ।
क्लेभरलीले आफ्नो आधिकारिक ट्वीटर ह्यान्डलमा लेख्नुभएको छ, “विदेशी कूटनीतिज्ञहरूमाथि बढ्दो धम्कीका कारण बेलायतले सुडानबाट दूतावासका कर्मचारीहरूलाई हटाएको छ । हाम्रो उच्च प्राथमिकता बेलायती नागरिकको सुरक्षा हो । सुडानमा भइरहेको रक्तपात अन्त्य का लागि अन्तर्राष्ट्रिय सहयोग जुटाउन हामी अहोरात्र खटिरहेका छौं ।”
बेलायतका प्रधानमन्त्री ऋषि सुनकले सुडानबाट बेलायती कुटनीतिज्ञ र उनीहरूका परिवारलाई बेलायती सेनाले ‘जटिल र द्रूत उद्धार’ पूरा गरेको बताउनुभएको छ ।
त्यसैगरी, जर्मनीले आफ्ना साझेदारहरूसँगको समन्वयमा सुडानबाट आफ्ना नागरिकलाई उद्धार गर्न सुरु गरेको जर्मनीको रक्षा र विदेश मन्त्रालयले आइतबार ट्वीट गरेको छ ।
“सुडानको यो खतरनाक परिस्थितिमा हाम्रो उद्देश्य खार्तूमबाट धेरैभन्दा धेरै (जर्मन) नागरिकलाई बाहिर निकाल्नु हो । हाम्रो सम्भावनाको दायराभित्र रहेर हामी ईयू र अन्य नागरिकलाई पनि साथमा ल्याउनेछौँ,” जर्मन विदेश मन्त्रालयले जनाएको छ ।
त्यस्तै, क्यानाडाले सुडानमा कुटनीतिक गतिविधि अस्थायी रूपमा स्थगन गर्ने घोषणा गरेको छ ।
“सुडानको अवस्था तीव्र गतिमा बिग्रँदै गएको छ, जसले गर्दा खार्तुममा रहेका हाम्रा कर्मचारीको सुरक्षा र सुरक्षाको रक्षा गर्न असम्भव भएको छ,” सरकारको कूटनीतिक विभाग ग्लोबल अफेयर्स क्यानडाले जारी गरेको विज्ञप्तिमा भनिएको छ ।