खाडी मुलुकको तुलनामा नेपालीको रोजाई मलेसिया, एकवर्षमा दुई लाख ६० हजार युवा प्रस्थान
प्रकाशित मिति : श्रावण ३२, २०८० बिहीबार
नेपालमै रोजगारीको अवसर प्रदान नहुँदा लाखौं नेपालीहरु देश छाड्ने क्रम जारी छ । नेपालीहरु आफ्नो जीविकोपार्जनको लागि दैनिकी हजारौंको सख्यामा घरपरिवार छाडेर विरानो देशमा गइरहेका छन् ।
पछिल्लो समय नेपालीहरुले वैदेशिक रोजगारीको लागि नयाँ नयाँ आकर्षक गन्तव्यहरु खोज्न थालेका छन् । तर, युरोप लगायतका देशहरुमा युवाहरुको आकर्षण देखिए पनि प्रायः युवाहरु खाडी मुलुक र मलेसिया जाने गरेका छन् । स्वदेशमै बसेर गुजारा चलाउन गाह्रो परेपछि नेपाली युवाहरु रोजगारीको लागि त्यता नै जाने गरेका हुन् । रोजगारीका लागि मलेसिया नेपालीहरुको आकर्षण र बाध्यता बनेको छ ।
गत आर्थिक वर्ष २०७९/८० मा सबैभन्दा धेरै नेपाली रोजगारीका लागि मलेसिया गएका छन् । एक वर्षमा ७ हजार २९९ महिलासहित २ लाख ५९ हजार ५९४ जना मलेसिया जान नयाँ श्रम तथा पुनः श्रम स्वीकृति लिएका हुन् । जसमध्ये २ लाख १९ हजार ३५७ जना पहिलो पटक रोजगारीका लागि मलेसिया पुगेको वैदेशिक रोजगार विभागको तथ्यांकमा उल्लेख छ । कोभिड–१९ पछि ठूलो संख्यामा नेपाली श्रमिकहरु मलेसिया गएका हुन् ।
कोरोना संक्रमणको समयमा मलेसियाबाट ठूलो संख्यामा नेपालीहरु स्वदेश फर्किनु परेको थियो । कोरोना पछि मलेसियामै गरिरहेको कम्पनीले फेरि अफर गर्दा मलेसिया जानेहरु बढेको विभागका निर्देशक कबिराज उप्रेती बताउँछन् । ‘कोभिड–१९ को समयमा ठूलो संख्यामा नेपालीहरु स्वदेश फर्किनु परेको थियो । कोरोनापछिको समयमा मलेसियामै गरिरहेको कम्पनीले फेरि अफर गर्दा पनि मलेसिया जाने बढेका हुन भन्ने हाम्रो बुझाई छ ’, निर्देशक उप्रेतीले भने ।
मलेसियाको भूगोल, हावापानी नेपालकोसँग मिल्दोजुल्दो भएकाले पनि त्यहाँको आकर्षण बढेको विभागको विश्लेषण छ । नेपालीहरु मलेसियामा वर्षौ पहिलेदेखि नै काम गर्दै आइरहेको र आफन्त, चिनजान र साथीभाईहरुको संगतले पनि यूवाहरु मलेसिया जाने गरेको उनले बताए । अन्य मुलुकहरुको तुलना मलेसिया जाने प्रक्रिया सहज, हवाई टिकट सस्तो र तीन वर्षको करार अवधीले पनि नेपाली यूवाहरुले मलेसियालाई रोज्ने गरेका छन् ।
मलेसिया सरकार पनि पछिल्लो समय श्रमिकको पक्षमा लचिलो बन्दै गएको छ । आधारभूत तलब बढाएर १५ सय रिंगिट पुराइएको छ । साथै, मलेसियाको सरकारले मृत्युदण्डको सजाय हुने लगायत केही कानुनमा सुधार गरेको छ । नेपाली श्रमिकहरुले वैदेशिक रोजगारीमा मलेसियालाई प्राथमिकतामा राख्ने गरेका छन् ।