अमेरिकामा कागजपत्रविहीन आप्रवासीहरुमा भारतीयको संख्या तेश्रो ठूलो
प्रकाशित मिति : फाल्गुन २०, २०८० आईतबार
अमेरिकामा कागजपत्रविहीन आप्रवासीहरुमा भारतीयको संख्या तेश्रो ठूलो रहेको प्यू रिसर्च सेन्टरको अनुमानले देखाएको छ । उक्त पछिल्लो अनुमान अनुशार अमेरिकामा भारतीय कागजपत्रविहीनहरुको संख्या झण्डै ७ लाख २५ हजार रहेको छ, जुन मेक्सिको र एल साल्भाडोरका कागजपत्रविहीनहरुकोपछि सबैभन्दा ठूलो संख्या हो ।
अमेरिकामा ४० लाख ५० हजार मेक्सिकनहरु र ८ लाख एल साल्भाडोरियनहरु कागजपत्रविहीन रहेको प्यू रिसर्च सेन्टरको अनुमान छ । भारतीयहरुपछि चौथो नम्बरमा ग्वाटेमालाका ७ लाख, होण्डुरसका ५ लाख २५ हजार र चाइनाका ३ लाख ७५ हजार कागजपत्रविहीनहरु अमेरिकामा रहेको अनुमान गरिएको छ ।
सबैभन्दा धेरै कागजपत्रविहीनहरु अमेरिकामा हुनेमा शीर्ष पाँचमा ल्याटिन अमेरिका बाहिरको भारत एक मात्र देश हो । सन् २०११ पछि अमेरिकामा कागजात नभएका भारतीयहरूको संख्या ७० प्रतिशतले बढेको छ, जुन सबै राष्ट्रियताहरूको तुलनामा सबैभन्दा छिटो वृद्धि हो। अमेरिकाको सीबीपीको तथ्याङ्कले २०२० र २०२३ को बीचमा कागजपत्रविहीन भारतीय आप्रवासीको संख्या सबैभन्दा छिटो बढेको देखाउँछ।
२०११ को तुलनामा मेक्सिकन कागजपत्रविहीनको संख्या भने २०२१ मा आउँदा ३४ दशमलव २ प्रतिशतले घटेको देखिएको छ । एल साल्भाडोरका १४ दशमलव ३ प्रतिशत, ग्वाटेमालाका ३३ दशमलव ३ प्रतिशत, होण्डुरसका ६१ दशमलव ६ प्रतिशत, चाइनाका १५ दशमलव ४ प्रतिशत बढेको देखिएको छ ।
विना भिसा अमेरिका प्रवेश गर्ने भारतीय आप्रवासीहरू प्रायजसो मध्यमवर्गीय परिवारका रहेो जनाइएको छ । उनीहरू हिडेर अमेरिका आउनका लागि दलाललाई भुक्तान गर्न आफ्नो जग्गा बेच्छन् । उनीहरुले ४० हजारदेखि १ लाख डलरसम्म खर्च गर्ने गरेको पाइएको छ । अमेरिकामा काम गर्दा उनीहरूको पारिश्रमिक तीन गुणा बढी हुने र आफ्ना छोराछोरीको लागि सुरक्षित भविष्य निर्माण हुने उनीहरुको अपेक्षा छ ।
भारतीय आप्रवासीहरू सुरुमा सजिलै भिषा पाउने देशहरुमा जान्छन् । त्यसपछि दलालहरुले अमेरिका वा क्यानडाको नजिक भएका देशहरुमा पठाउँछन् । त्यहाँबाट उनीहरु हिडेर नै यात्रा तय गर्छन् । , त्यसपछि उनीहरूले कति रकम तिर्छन् भन्ने आधारमा उनीहरू हिडेर वा गाडीमाफर्त अमेरिकी सीमा नजिक पुग्छन् । भारतमा सुरक्षित महसुस नगरेका कारण अमेरिका आएको भन्दै उनीहरुमध्ये प्रायले एसाइलम दावी गर्छन् ।
यो बाटोबाट अमेरिका आउँदा एक दर्जन देशहरू पार गर्नुपर्ने हुन सक्छ भने एक वर्ष भन्दा बढी लाग्न सक्छ। कठिन यात्राका क्रममा कतिपयको ज्यान समेत जाने गरेको छ ।