विनाभिसा मेक्सिकोबाट अमेरिका प्रवेश गर्न खोज्दा एकबर्षमा ८२४ नेपालीलाई पक्राउपछि हिराशतमा
प्रकाशित मिति : चैत्र ५, २०८० सोमबार
दलाललाई मोटो रकम बुझाएर विनाभिसा मेक्सिकोको सिमाक्षेत्रबाट अमेरिका प्रवेश गर्नखोज्दा आर्थिक बर्ष २०२३ मा ८२४ जना नेपालीहरुलाई पक्राउ गरेर अध्यागमन हिराशतमा राखिएको छ । इमिग्रेशन एण्ड कस्टम इन्फोर्समेन्ट आइसको तथ्यांक अनुशार उनीहरु सीबीपीबाट सीमाक्षेत्रमा पक्राउपछि आइसलाई स्थानान्तरण गरिएकाहरु हुन्। यो संख्या आर्थिक बर्ष २०२२ मा ९४१ र आर्थिक बर्ष २०२१ मा ३७३ थियो ।
तीमध्ये सबैजना अहिलेसम्म अध्यागमन हिराशतमा भने छैनन् । उनीहरुमध्ये कतिपय अमेरिकामा छुटिसकेका छन् भने कतिपय नेपाल देशनिकाला भइसकेका छन् । केही अझै अध्यागमन हिराशतमा छन् ।
यो बाहेक आर्थिक बर्ष २०२३ मा विभिन्न अपराध गरेका कारण आइसको हिराशतमा पर्ने नेपालीहरु थप ११ जना थिए । यो संख्या २०२२ मा २१ जना र २०२१ मा ११ जना थिए । उनीहरु आपराधिक अभियोग भएका व्यक्तिहरू, विचाराधीन आपराधिक आरोपहरू भएका व्यक्तिहरू वा कुनै अभियोग वा पेन्डिङ चार्ज नभएका तर अमेरिकी अध्यागमन कानुन तोडेकाहरु रहेको आइसले जनाएको छ ।
अध्यागमन कानुन तोडेको भन्नाले ज्ञात आपराधिक अभियोग नभएका वा देशनिकालापछि पुन अमेरिका प्रवेश गरेर बारम्बार अमेरिकी कानून उल्लङ्घन गरेकाहरु छन् । अध्यागमन न्यायाधीशद्वारा देशनिकालाको अन्तिम आदेश आदेशपछि पनि नफर्केकाहरु र विदेशमा गरेको अपराधका लागि विदेशी फरार व्यक्तिहरू पनि यसमा पर्छन् । तर ११ जनामा कतिजना कुन अपराधमा अध्यागमन हिराशतमा परेका थिए भन्नेबारे केही बताइएको छैन ।
अध्यागमन हिराशतमा परेका ८३५ जना नेपालीमध्ये ५६ जनालाई इमिग्रेशन एण्ड कस्टम इन्फोर्समेन्ट आइसले नै आफै पक्राउ गरेको थियो । त्यसमध्ये ११ जना अपराधको अभियोग लागेकाहरु थिए भने ४३ जना अध्यागमन कानुनको उल्लंघन गरेकाहरु रहेको आइसले जनाएको छ । २ जना अन्य अभियोग लागेकाहरु थिए ।
आर्थिक बर्ष २०२३ मा आइसबाट पक्राउ पर्ने नेपालीहरुको संख्या आर्थिक बर्ष २०२२ को तुलनामा झण्डै दोब्बर हो । आर्थिक बर्ष २०२२ मा आइस आफैले ३० जनालाई पक्राउ गरेको थियो, जसमा ९ जना आपराधिक अभियोग भएकाहरु र २१ जना अध्यागमन कानुनको उल्लंघन गरेकाहरु थिए । आर्थिक बर्ष २०२१ मा आइसले पक्राउ गरेका नेपालीहरुको संख्या जम्मा ११ थियो ।
आर्थिक बर्ष २०२३ मा इमिग्रेशन एण्ड कस्टम इन्फोर्समेन्ट आइसले देशनिकाला गरेका नेपालीहरुको संख्या २२ थियो । यो संख्या आर्थिक बर्ष २०२२ मा २८ र २०२१ मा २३ थियो ।
