उरुग्वेका स्टार स्ट्राइकर सुआरेजद्धारा सन्यासको घोषणा
प्रकाशित मिति : भाद्र १७, २०८१ सोमबार
उरुग्वेका फुटबलर लुइस सुआरेजले अन्तर्राष्ट्रिय फुटबलबाट सन्यासको घोषणा गरेका छन् ।
३७ वर्षको उमेरमा लिभरपुल र बार्सिलोनाका पूर्व फरवार्ड समेत रहेका सुआरेजले शुक्रबार पाराग्वेविरुद्ध आफ्नो अन्तिम अन्तर्राष्ट्रिय खेल खेल्ने बताएका छन ।
उरुग्वेका लागि सर्वाधिक गोलकर्ता रहेका उनले राष्ट्रिय टिमबाट १४२ खेल खेल्दै ६९ गोल समेत गरेका छन् । सुआरेजले सन् २००७ मा अन्तर्राष्ट्रिय फुटबलमा डेब्यु गरेका थिए ।
सेन्टेनारियो रंगशालामा आयोजित पत्रकार सम्मेलनमा सुआरेजले शुक्रबार मेरो देशको राष्ट्रिय टोलीसँग अन्तिम खेल हुनेछ भनेका छन ।
विश्वकप छनोटको खेलमा उरुग्वेले पाराग्वेसँग घरेलु मैदानमा खेल्नेछ ।
सुआरेजले उरुग्वेको राष्ट्रिय टिमबाट ४ पटक विश्वकप र ५ पटक कोपा अमेरिका खेलेका छन् ।
उनले सन् २०११ मा कोपा अमेरिकाको उपाधि समेत जितेका थिए । कोपा अमेरिका जित्नु आफ्नो करियरको सबैभन्दा उत्कृष्ट क्षण रहेको सुआरेज पत्रकार सम्मेलनमा बताए ।
लिओनल मेसीसँगै मेजर सकर लिग क्लब इन्टर मायमीमा सुआरेज खेल्छन् । उनले क्लब करियरलाई भने निरन्तरता दिने बताएका छन ।
