ओबामा केयर परिवर्तन गर्ने ट्रम्पको भनाई
प्रकाशित मिति : भाद्र २६, २०८१ बुधबार
अमेरिकी राष्ट्रपति पदका उम्मेदवार तथा पूर्व राष्ट्रपति डोनाल्ड ट्रम्पले आफुले चुनाव जिते ओबामा केयर परिवर्तन गर्ने बताउनु भएको छ ।
उपराष्ट्रिपति एवं नोभेम्बरमा हुने राष्ट्रपति पदका उम्मेदवार कमला ह्यारिससंगको फिलाडेल्फियामा भएको एबिसी न्युज बहसमा डोनाल्ड ट्रम्पले ओवामा केयर राम्रो कार्यक्रम नभएको र सबैको हित नगरेको बताउनु भयो । ओवामा केयरलाई अमेरिकामा सस्तो हेरचाह ऐन मानिन्छ ।
ट्रम्पले ओबामा केयरलाई राम्रो नभएको भन्दै नयाँ कार्यक्रमले प्रतिस्थापन गर्ने र सोही दिशामा काम गरिरहेको बताउनु भयो । ट्रम्पले डेमोक्र्याट पार्टीले ओबामा केयर खारेज गर्न असफल भएको आरोप लगाउनु भयो ।
उहाँले आफूले सही काम गरेको र विचार र विकल्पको मूल्याङ्कन गरिरहने उल्लेख गर्नुभयो । ट्रम्पले ओबामा केयरको तुलनामा जनता र जनसङ्ख्यालाई कम बोझ हुने योजना आवश्यक छ भन्नुभयो ।
बहसका दौरानमा आप्रवासन , रुस युक्रेन युद्ध , इजरायल गाजा तनाव लगाएतका विबिध विषयमा बहस भएको थियो । बहसमा कमला ह्यारिसले ट्रम्पको आर्थिक नीतिलाई निशाना बनाउनु भएको थियो । बहस ९० मिनेट चलेको थियो । यो बहस राष्ट्रपति चुनावको लागि दोश्रो भएपनि ट्रम्प र ह्यारिसबिचको भने पहिलो हो ।