आईसीसी विश्वकप लिग २ : ओमानसंग बदला लिने नेपाललाई मौका
प्रकाशित मिति : आश्विन ७, २०८१ सोमबार
हारको क्लिन स्विपबाट जोगिने लक्ष्य सहित नेपालले आज ओमानको सामना गर्दैछ । नेपालले ओमानसंगको पहिलो खेल १ विकेटले गुमाएको थियो ।
आईसीसी विश्वकप लिग २ अन्तर्गत त्रिकोणात्मक एकदिवसीय सिरिजमा नेपालले ओमानसँग प्रतिस्पर्धा गर्न लागेको हो ।
क्यानडाको किङ्ग सिटीमा खेल नेपाली समय अनुसार राती पौने ९ बजेबाट सुरु हुनेछ । क्यानडा भ्रमणमा ३ खेल गुमाइसकेको नेपाललाई आजको खेल जित्नै पर्ने दबाब छ ।
यो खेलपनि हारेको खण्डमा नेपालले हारको क्लिन स्विप लिएर क्यानडा भ्रमणको अन्त्य गर्नुपर्ने अबस्था आउने छ ।
यो सिरिजमा नेपालले लगातार खराव प्रर्दशन गरिरहेको छ । घरेलु टोली क्यानडासंगका दुबै खेल नेपालले हारिसकेको छ ।
पहिलो खेलमा क्यानडासँग नेपाल १ सय ३ रनको फराकिलो अन्तरले पराजित भएको थियो ।
ओमानविरुद्ध १ विकेटले पराजित भएको नेपालले तेस्रो खेलमा घरेलु टोलीविरुद्ध ५ विकेटको हार सहनु परर्यो ।
लिग २ को आफ्नो दोस्रो सिरिज खेलिरहँदा ७ मध्ये केवल १ जित हात पारेको नेपाल २ अंकसहित पुछारबाट दोस्रो स्थानमा छ ।
६ खेलमा ५ अंक जोडेको ओमान छैठौं स्थानमा छ । ११ खेलमा १४ अंक जोडेको घरेलु टोली क्यानडा शीर्ष स्थानमा छ ।