युनाइटेड हेल्थ केयरका सीईओ थोम्पसनको न्यूयोर्कमा गोली हानी हत्या
प्रकाशित मिति : मंसिर १९, २०८१ बुधबार
अमेरिकाको न्यूयोर्कमा रहेको युनाइटेड हेल्थ केयरका सीईओ ब्रायन थोम्पसनको बुधबार बिहान म्यानहट्टनको मिडटाउनमा गोली हानी हत्या गरिएको छ ।
उनी कम्पनीको वार्षिक लगानीकर्ता सम्मेलनमा सहभागी हुन होटलतर्फ जाँदै गर्दा सुनियोजित हमला भएको न्यूयोर्क प्रहरीले जनाएको छ ।
गोली हान्ने व्यक्ति अहिले फरार छन् । तर प्रहरीका अनुसार भाग्ने क्रममा उनले केही महत्त्वपूर्ण सुराकहरू छाडेका हुन सक्छन् ।
घटनाको विवरण
एनवाईपीडीका कमिश्नर जेसिका टिस्चका अनुसार बिहान ७ बजेभन्दा केहीअघि चिसो तापक्रमका कारण मास्क लगाएका आक्रमणकारीले हिल्टन मिडटाउन होटलबाहिर थुप्रै समय पर्खेर हमला गरेका थिए । आक्रमणकारीले आफ्नो लक्ष्य स्पष्ट रूपमा पहिल्यै छनोट गरेको जस्तो देखिएके छ ।
प्रहरीका अनुसार आक्रमणकारीले थोम्पसनलाई पछाडिबाट कम्तिमा एक पटक ढाडमा र एक पटक दाहिने खुट्टामा गोली प्रहार गरेका थिए । गम्भीर अवस्थामा रहेका थोम्पसनलाई तत्काल माउन्ट साइनाई वेस्ट अस्पताल लगिएको थियो । त्यहाँ उनलाई मृत घोषणा गरियो ।
आक्रमणको सम्भावित कारण अज्ञात
प्रहरीले आक्रमणको कारणबारे हालसम्म केही खुलाएको छैन । तर सीएनएनका अनुसार युनाइटेड हेल्थ ग्रुपका उच्च पदस्थ कर्मचारीहरूमाथि केही समयदेखि धम्की आइरहेको थियो । ती धम्कीमा थोम्पसनको नाम भने स्पष्ट रूपमा उल्लेख गरिएको थिएन । थोम्पसनकी पत्नी पौलेटले केही धम्कीबारे जानकारी थियो भनेकी छन ।
तर म विस्तृत रूपमा थाहा नभएको उनले बताइन ।
आक्रमणको भिडियो
प्रहरीले प्राप्त गरेको निगरानी भिडियोका आधारमा आक्रमणकारी सडकपारि गाडीको पछाडि लुकेर बसेका थिए । उनले फुटपाथमा अन्य व्यक्तिहरूलाई बेवास्ता गर्दै थोम्पसनलाई पछाडिबाट गोली हानेका थिए । बन्दुक बारम्बार जाम भए पनि आक्रमणकारीले त्यसलाई तुरुन्तै ठीक गर्दै गोली चलाउन जारी राखेका थिए ।