टिकटकमाथिको प्रतिबन्धमा अदालतको साथपछि मेटा, स्न्याप र अल्फाबेटका शेयर मूल्यमा वृद्धि
प्रकाशित मिति : मंसिर २२, २०८१ शनिबार
अमेरिकामा टिकटकमाथिको प्रतिबन्धमा अदालतको साथपछि अमेरिकामा मेटा, स्न्याप र अल्फाबेटका शेयर मूल्यमा वृद्धि भएको छ । शुक्रबार अदालतको निर्णयपछि मेटा, स्न्याप र अल्फाबेटका शेयर मूल्यमा क्रमशः २.४ प्रतिशत, २.२ प्रतिशत, र १.२ प्रतिशतले वृद्धि भएको हो ।
अमेरिकामा राष्ट्रपति निर्वाचित डोनाल्ड ट्रम्पले आफ्नो पहिलो कार्यकालमा टिकटकमाथि प्रतिबन्ध लगाउने प्रयास गरेका थिए। तर, अहिले उनले प्रचार अभियानका क्रममा टिकटक प्रतिबन्धको विरोध गरेका छन् । सामाजिक सञ्जाल प्लेटफर्मलाई बचाउने काम गर्ने बताएका छन्।
तर, शुक्रबार अमेरिकी संघीय अदालतले एक कानूनलाई अनुमोदन गरेको छ, जसले टिकटकमाथि प्रतिबन्ध लगाउन सक्ने सम्भावना बढाएको छ। यसको प्रतिक्रिया स्वरूप टिकटकले आफ्नो मुद्दा सर्वोच्च अदालतसम्म लैजाने घोषणा गरेको छ।
सर्वोच्च अदालतले अमेरिकाको स्वतन्त्र अभिव्यक्तिको अधिकारको सुरक्षा गर्ने ऐतिहासिक परम्परा रहेको र यस महत्त्वपूर्ण संवैधानिक मुद्दामा पनि त्यही गर्ने विश्वास रहेको टिकटकले वक्तव्यमा बताएको छ । टिकटक प्रतिबन्ध गलत र काल्पनिक जानकारीमा आधारित रहेको र यसले अमेरिकी जनताको अभिव्यक्तिलाई पूर्णरूपमा दबाउने काम गर्ने टिकटकको भनाई छ । यो प्रतिबन्धले १७ करोडभन्दा बढी अमेरिकी र विश्वभरका मानिसहरूको आवाजलाई १९ जनवरी, २०२५ देखि रोक्न सक्छ।
अदालतको निर्णयअनुसार टिकटकले आफ्ना चीनस्थित मातृ कम्पनी बाइटडान्ससँग सम्बन्ध तोड्नुपर्नेछ वा मध्य जनवरीसम्म अमेरिकाबाट प्रतिबन्धित हुनुपर्नेछ। यसले अमेरिकी सामाजिक सञ्जाल कम्पनीहरूको भविष्यमा परिवर्तन ल्याउन सक्ने अनुमान गरिएको छ।
यसले मेटा (इन्स्टाग्राम), अल्फाबेट (युट्युब), र स्न्याप (स्न्यापच्याट) जस्ता प्रतिद्वन्द्वी कम्पनीहरूका लागि छोटो समयको लागि फाइदा पुर्याउन सक्छ।धेरै टिकटक प्रयोगकर्ताहरू अहिले विभिन्न प्लेटफर्महरूमा आफ्नो सामग्री पोस्ट गरिरहेका छन्, किनकि उनीहरूले यो परिस्थिति आउँछ भनेर अनुमान गरेका थिए।
संघीय सरकारले टिकटकको डाटा सङ्कलन र चीनसँगको सम्बन्धबारे चिन्ता व्यक्त गर्दै आएको छ। टिकटकले भने अमेरिकी प्रयोगकर्ताको डाटा सुरक्षाका लागि २ अर्ब डलरभन्दा बढी लगानी गरेको दाबी गरेको छ।
