रुसले शनिबार राती १५० ड्रोन आक्रमण गरेको युक्रेनको दाबी, थप कडा प्रतिबन्धको माग
प्रकाशित मिति : चैत्र १०, २०८१ आईतबार
युक्रेनी राष्ट्रपति भोलोडिमिर जेलेन्स्कीले शनिबार राति रुसले लगभग १५० ड्रोनले युक्रेनमा आक्रमण गरेको दाबी गरेका छन्। उनले आफ्नो एक्स ह्यान्डलमार्फत रुसले युक्रेनमा गरेको आक्रमणको जानकारी दिँदै रुसमाथि थप कडा प्रतिबन्धहरूको माग गरेका हुन् ।
जेलेन्स्कीले लेखेका छन्, “हिजो राति रुसले युक्रेनमा लगभग १५० ड्रोनले आक्रमण गर्यो। यस आक्रमणमा किभमा तीन जनाको ज्यान गएको छ, जसमा एक बुबा र उनकी पाँच वर्षीया छोरी पनि समावेश छन्। आक्रमणमा हालसम्म एक बच्चासहित दश जना घाइते भएका छन्।”
“आक्रमणका कारण जापोरिजियामा तीन जनाको मृत्यु भएको थियो, जसमा एकै परिवारका तीन जना सदस्य पनि थिए। मृतकका परिवारप्रति मेरो समवेदना छ।”, उनले लेखेका छन् ।
जेलेन्स्कीले रुसबाट हुने आक्रमणहरू दैनिक घटना बनेको समेत बताए । उनका अनुसार रुसले यस हप्ता युक्रेनमा १५८० भन्दा बढी गाइडेड बम, लगभग ११०० ड्रोन र १५ वटा मिसाइल प्रहार गरेको छ।
आफ्नो पोस्टमा उनले लेखेका छन्, “रुसी आतङ्ककारीहरू विरुद्धको प्रतिबन्धलाई अझ प्रभावकारी बनाउनुपर्छ। यी प्रतिबन्धहरूको प्रभावबाट रुसले बच्न सक्ने हरेक तरिका बन्द गर्नुपर्छ। यसमा थप दबाब दिन र यी आक्रमणहरूसँग युद्ध रोक्न नयाँ निर्णयहरू लिनु आवश्यक छ।”
यसअघि रुसी रक्षा मन्त्रालयले करिब ६० आक्रमणकारी युक्रेनी ड्रोनहरूलाई निशाना बनाएको दाबी गरेको थियो। रक्षा मन्त्रालयका अनुसार यीमध्ये धेरैजसो दक्षिणी रोस्तोभ क्षेत्रमा खसालिएका थिए।
यसैबीच, रोस्तोभका गभर्नरले एउटा ड्रोन कारमा खसेको दाबी गरेका छन्, जसले गर्दा कारमा आगो लागेको छ । यस घटनामा एक जनाको मृत्यु भएको छ।