नेपाली सेनाको परीक्षामा संलग्न १२ जना नक्कली परीक्षार्थी पक्राउ
प्रकाशित मिति : चैत्र १०, २०७४ शनिबार
चैत १०, काठमाडौं । नेपाली सेनाले लिएको सैन्यतर्फको लिखित परीक्षामा नक्कली परीक्षार्थी सहभागी भएको भेटिएको छ । शनिबार विभिन्न परीक्षा केन्द्रबाट ११ जना नक्कली परीक्षार्थीलाई पक्राउ गरिएको नेपाल प्रहरीले जनाएको छ । अरुलाई परीक्षा दिन पठाउने अर्का एकजना पनि समातिएका छन् ।
प्रहरीले सीआईटी कलेज, कोटेश्वरबाट १० जना नक्कली परीक्षर्थीलाई नियन्त्रणमा लिएको महानगरीय प्रहरी परिसर काठमाडौंमा वरिष्ठ प्रहरी उपरीक्षक ९एसएसपी० विश्वराज पोखरेलले जानकारी दिए ।
उनकाअनुसार आरआर कलेजबाट एकजना फर्जी परीक्षार्थी पनि समातिएका छन् । उनीहरु सबैले अर्काको नाममा परीक्षा दिँदै थिए ।
आफ्नो परीक्षा दिन अरुलाई पठाउने एक जना पनि पक्राउ परेका छन् । उनीहरुलाई महानगरीय प्रहरी वृत्त बानेश्वरमा राखेर थप अनुसन्धान अघि बढाइएको पोखरेलले बताए ।
यसअघि सुरक्षा निकायमा परीक्षामा यसरी नक्कली परीक्षार्थी भेटिने गरेका थिएनन् । शैक्षिक परीक्षाहरुमा अहिले नक्कली परीक्षार्थीको बिगबिगी हुने गरेको छ ।
अब यो ‘रोग’ रोजगारीका लागि लिइने सरकारीस्तरका परीक्षाहरुमा पनि सरेको छ । कमजोर परीक्षार्थीले आर्थिक मिलेमतो गरेर नक्कली परीक्षार्थी पठाउने गरेका छन् ।
कतिपय भने आफन्त तथा साथीसंगी पनि यस्तो काममा संलग्न हुने गरेका छन् ।
शनिबार पक्राउ परेकामध्ये ८ जना महिला छन् ।
