नेपाली सेनाको क्याम्प नजिकै बम विस्फोट हुँदा एक जना घाइते
प्रकाशित मिति : चैत्र २२, २०७४ बिहीबार
चैत २२, जनकपुरधाम । धनुषाको धनुषाधाम नगरपालिकामा बम विस्फोट हुँदा एक जना घाइते भएका छन्। पूर्व–पश्चिम राजमार्ग अन्तर्गत धनुषाधाम नगरपालिका– ९ धारापानीस्थित नेपाली सेनाको क्याम्प नजिकै बिहीबार बिहान भएको बम विस्फोटमा एक जना घाइते भएका हुन्। बम बिस्फोटमा परी घाइते हुनेमा सोही ठाउँका ६४ वर्षीय तीर्थमाया तामाङ्ग रहेको जिल्ला प्रहरी कार्यालय धनुषाले जनाएको छ। तामाङ्ग बिहानै आफ्नै आँपको बारीमा काम गर्न जाँदै गरेको बेलामा बम विस्फोट भएको थियो। विस्फोटबाट तामाङ्गको हात र खुट्टामा गम्भीर चोट लागेको छ। जिल्ला प्रहरी कार्यालय धनुषाका अनुसार पान परागको बट्टामा राखिएको विस्फोटक पदार्थ विस्फोट भएको हो। सुतली बम बनाउन वा सो बममा प्रयोग हुने बारुदको प्रयोग गरिएको हुन सक्ने धनुषाका प्रहरी नायव उपरीक्षक प्रविण धितालले जानकारी दिए। घाइते तामाङ्गको जनकपुरस्थित अञ्चल अस्पतालमा उपचार भइरहेको छ।