सलमान जेठमा काठमाडौँ आउने : आयोजक भन्छन्, ‘यसपटक सुरक्षाको कडा व्यवस्था हुन्छ’
प्रकाशित मिति : चैत्र २६, २०७४ सोमबार
भारतीय अभिनेता सलमान खानसहित बलिउड कलाकारहरु ‘द–ब्याङ्ग’ टुरमा आगामी जेठमा नेपाल आउने भएका छन् ।
यसअघि, विप्लव नेतृत्वको नेपाल कम्युनिष्ट पार्टीको विरोधपछि फागुन २६ गते हुने भनिएको पूर्व निर्धारित कार्यक्रम सुरक्षाको कारण देखाउँदै रद्द भएको थियो ।
कार्यक्रमका आयोजक ओडिसी इन्टरटेनमेन्टका अनुसार अब कार्यक्रम १२ जेठमा काठमाडौँको टुँडिखेलमा आयोजना हुनेछ ।
कृष्णसार शिकारको मामिला सलमान जेल चलान भएपछि कार्यक्रमबारे अन्यौलता थपिएको थियो । सलमानले सो मुद्दामा जमानत पाए पनि देश बाहिर जान नपाउने भनिएको छ ।
जेए इभेन्टसले विज्ञप्ति जारी गर्दै सलमान आउने कार्यक्रमको नयाँ तालिका सार्वजनिक गरेको हो ।
कार्यक्रमका आयोजक तथा ओडिसीका अध्यक्ष सिमान्त गुरुङले कार्यक्रमका लागि डेढ महिना समय बाँकी भएकाले आजबाटै जोडतोडका साथ तयारी शुरु गर्ने बताए ।
‘टिकट पनि अर्को साताबाट बिक्री वितरण शुरु गर्छौं,’ उनले भने, ‘यसमा पुरानै टिकट चलाउँछौँ । पहिले बेचेको करिब २ हजार टिकट फ्यानहरुसँगै छ, त्यो टिकट उहाँहरुले विश्वास गरेर होल्डमा राखिदिनुभएको छ ।’
गुरुङले ग्लोबल आइएमई बैंक, भाटभटेनी लगायतका मुख्य स्थानबाट टिकट वितरण शुरु गर्ने तयारी गरेको पनि जानकारी दिए ।
उनले सुरक्षा प्रवन्धका लागी पहिले नै अनुमति पाएको बताउँदै अब सुरक्षा निकायलाई पनि जानकारी गराएर थप तयारी पूरा गर्ने बताए ।
‘पहिले टिकट वितरण भएको हेर्दा २५ देखि ५० हजार टिकट विक्री हुने अनुमान गरेका छौं,’ गुरुङले भने ।
आडिसी इन्टरटेनमेन्टले राष्ट्र बैंक मार्फत खानलाई ६ करोड बढी पैसा पठाइसकेको गुरुङले दाबी गरेका छन् ।
कार्यक्रमको १० देखि १२ करोडको लागत अनुमान गरिएको छ ।
कार्यक्रममा सलमानसहित सोनाक्क्षी सिन्हा, कृति सानोन, प्रभुदेवा, डेजी शाह, मित ब्रोज, मनिष पल र डान्स क्रुहरु आउने छन् ।