जनकपुरमा मोदीलाई ५ घेराको सुरक्षा, रंगभूमि मैदान सिंगार्न २४ घण्टा काम
प्रकाशित मिति : बैशाख १९, २०७५ बुधबार
जनकपुरधाम । भारतीय प्रधानमन्त्री नरेन्द्र मोदीको जनपकुर भ्रमण र नागरिक अभिनन्दनको तयारी तिब्र पारिएको छ ।
प्रधानमन्त्री मोदीको जनकपुर भ्रमणको विषयमा स्थानीय स्तरमा समेत चर्चा हुन थालेको छ ।
रंगभूमि मैदानबाट जानकारी मन्दिर जाने बाटो र विवाह मण्डपको बाहिरी पर्खालमा रंगरोगन गरी मिथिला संस्कृति झल्किले चित्रकला बनाउन थालिएको छ । जानकी मन्दिरदेखि वाह्रविघा रंगभूमि मैदानसम्मका पर्खाल र भित्ताहरुमा राम-सीताको गाथा झल्किने गरी मिथिला चित्रकला बनाइएको छ ।
नागरिक अभिनन्दन हुने रंगभूमि मैदानलाई सजाउन चौबिसै घण्टा जस्तो काम भइरहेको छ । जनकपुर भ्रमणको क्रममा भारतीय प्रधानमन्त्रीलाई पाँच घेराको सुरक्षा बन्दोबस्त मिलाइएको सुरक्षा अधिकारीहरुले जनाएका छन् ।
सुरक्षाका लागि पहिलो घेरामा नेपाली सेना, दोस्रो घेरामा नेपाल प्रहरी, तेस्रो घेरामा सशस्त्र प्रहरी र सबभन्दा नजिकको अन्तिम घेरामा भारतीय सुरक्षाकर्मी खटिने र राष्ट्रिय अनुसन्धान विभागका गुप्तचरलाई सादा पोशाकमा अर्को घेरामा तैनाथ गरिनेछ ।
सुरक्षाको लागि नेपाल र भारत दुवै देशका सुरक्षाकर्मीहरुले आवश्यक रुपमा सुरक्षा तयारी गरिरहेका छन् ।
भारतीय प्रधानमन्त्री नरेन्द्र मोदीको भ्रमणका बेला जनकपुरको शान्ति-सुरक्षाको बन्दोबस्त उच्चस्तरको मिलाइएको सीमानाका क्षेत्रहरुमा समेत सुरक्षा निगरानी बढाइको प्रदेश २ का आन्तरिक मामिला तथा कानुनमन्त्री ज्ञानेन्द्रकुमार यादवले बताए ।
केही दिन यता जनकपुर भ्रमणको क्रममा मोदी पुग्ने रंगभूमि मैदान र जानकी मन्दिर प्राङ्गण वरीपरी विशेष निगरानी बढाएको छ ।
जनकपुरधाममा भारतीय प्रधानमन्त्री मोदीलाई जनकपुरधाम उपमहानगरपालिकाका मेयर लालकिशोर साहले नागरिक अभिनन्दन गर्ने कार्यक्रम छ । यसअघि खुल्ला शौच र फोहोरका कारण डम्पिङ साइटको रुपमा प्रयोग हुँदै आएको रंगभूमि मैदानको भारतीय प्रधानमन्त्री मोदी आउने चर्चासँगै रुपरंग फेरिदैछ ।