गणेश थापाको ‘छत्रछायाँ’बाट मुक्त भयो एन्फा, अध्यक्ष बने कर्माछिरिङ
प्रकाशित मिति : बैशाख २२, २०७५ शनिबार
अखिल नेपाल फुटबल संघ (एन्फा)को अध्यक्षमा कर्माछिरिङ शेर्पा विजयी भएका छन् । यससँगै एन्फा औपचारिक रुपमा गणेश थापाको छत्रछायाँबाट मुक्त भएको छ ।
उसाे त थापामाथि १८ कार्तिक २०७१ मै फिफाले प्रतिबन्ध लागेको थियो । ३० कार्तिक २०७२ मा फिफाले थापामाथि १० वर्षसम्म फुटबलसम्वन्धी कुनै पनि गतिविधिमा संलग्न हुन नपाउने गरी कडा प्रतिबन्ध लगायो ।
तर, एन्फामा उनको हालीमुहाली कायमै थियो । उनले चाहेका पत्रहरु नै एन्फाको नेतृत्वमा थिए । यो पटक उनले मणि कुँवरलाई अघि सारेका थिए ।
कुँवर थापाको आफ्नै सालो हुन् । तर, एन्फामा शुद्धीकरण अभियान चलाएका कर्माछिरिङले उनलार्इ पराजित गरेका छन् ।
कुँवरले अन्तिम समयमा आएर विधान सम्वत नभएको भन्दै चुनाव बहिस्कारको घोषणा पनि परे तर, निर्वाचन कमिटीले समय घर्किसकेको भन्दै उनको उम्मेदवारी फिर्ता स्वीकार गरेन र चुनाव गरायो ।
शनिबार भएको निर्वाचनमा अध्यक्षका उम्मेदवार कर्माछिरिङले ६३ मत पाएका छन् भने कुँवरले जम्मा १२ मत पाए ।
केन्द्रीय कार्यसमितिमा सबै कर्माछिरिझ समूहबाटै आएका छन् । चार उपाध्यक्षमा पंकजविक्रम नेम्वाङ, वीरबहादुर खड्का, कृष्ण थापा र उपेन्द्रमान सिंह विजयी भएका छन् ।
११ सदस्य पनि कर्मा समूहबाटै आएका छन् । सदस्यमा दावा लामा, निरोज खड्की, पूर्णमान चित्रकार, रविन्द्रनाथ श्रेष्ठ, मधुसुधन उपाध्याय, प्रदेश सिंह राठोर, दिवेश व्यञ्जनकार, दिर्घबहादुर केसी, विजय घले, रत्नकुमार श्रेष्ठ र किरण रार्इ विजयी भएका छन् ।
