हामी भ्रष्ट भए सदाचार कहाँ पाइएला ? : प्रम ओली
प्रकाशित मिति : जेष्ठ १६, २०७५ बुधबार
प्रधानमन्त्री केपी शर्मा ओलीप्रधानमन्त्री ओलीले वर्तमानसरकारले जनताको भरोसालाई तलमाथि पर्न नदिने दावी गरेका छन् ।
नेपाल राष्ट्रिय शिक्षक संगठनको १२औं महाधिवेशनको आज उद्ध्घाटन गर्दै प्रधानमन्त्री ओलीले भने, ‘जनताको लागि यो सरकार अन्तिम आशा हो । जनताको यो आशालाई तलमाथि पर्न दिइदैन । हामी भ्रष्ट भए सदाचार कहाँ पाइएला ? त्यसकारण सदाचार भएर देश बनाउन सबै लाग्नु पर्दछ ।’
प्रधानमन्त्री ओलीले बालबालिकालाई असफल गराएर सरकार र शिक्षा प्रणालीले अपराध गरिरहेको बताए ।
प्रधानमन्त्री ओलीले हरेक बालबालिकामा फरक फरक खालका क्षमता हुने तर शिक्षाले सैद्धान्तिक ज्ञानलाई मात्र मान्यता दिने नाममा बच्चालाई असफल गराएर ठुलो अन्याय गरेको बताए ।
‘असाधरण क्षमता भएका साना नानीहरुलाई हामी फेल बनाएर उनीहरुको हृदयमा बन्चरो हानिरहेका छौं’ प्रधानमन्त्री ओलीले भने ‘ती बच्चाहरु फेल होइन सरकार,शिक्षक,विद्यालय ,पाठ्यक्रम र शिक्षा प्रणाली फेल हो ।’
बच्चाहरुको क्षमता पहिचान गरेर रुचीको विधामा उनीहरुलाई सिक्ने अवसर प्रदान गर्नुपर्ने प्रधानमन्त्री ओलीको भनाइ छ ।
प्रधानमन्त्री ओलीले सरकारी विद्यालयको नतिजा सन्तोषजनक नरहेको बताए । शिक्षकहरुलाई नतिजा सुधार्नका लागि कक्षा कोठामा प्रविधिको प्रयोग र शिक्षकहरुलाई अध्ययन गर्ने बानी बसाउन आग्रह गरे ।
‘पढाउन नजान्ने शिक्षक राखेर हुदैन’ प्रधानमन्त्री ओलीले भने, ‘सबै शिक्षकहरुले आफूले पढाउने बिषयमा दक्षता हासिल गर्नुहेस । बिषयवश्तुको ज्ञान शिक्षकलाई नै छैन भने कसरी पढाउनुहुन्छ ?’
