भारतको संसदमा राहुलद्वारा मोदीसँग अंकमाल
प्रकाशित मिति : श्रावण ४, २०७५ शुक्रबार
भारतको प्रमुख प्रतिपक्षी दल भारतीय राष्ट्रिय कंग्रेसका अध्यक्ष राहुल गान्धीले प्रधानमन्त्री नरेन्द्र मोदीसँग अंकमाल गरेको विषयले खुब चर्चा पाएको छ ।
भारतको तल्लो सदन लोकसभाको वर्षे अधिवेशनअन्तर्गतको बैठकमा सहभागी हुनेक्रममा संसद भवनको बैठककक्षमा राहुलले मोदीलाई अनपेक्षितरूपमा अंकमाल गरेका हुन् ।
भारतीय संसदमा प्रधानमन्त्री मोदीकाविरुद्ध बिहीबार प्रतिपक्षी दल कंग्रेसले अविश्वासको प्रस्ताव दर्ता गराएको भोलिपल्ट शुक्रबार राहुलले मोदीलाई अंकमाल गरेकाले बढी चर्चा भएको बताइएको छ ।
प्रधानमन्त्री बसेकै ठाउँमा गएर राहुलले प्रधानमन्त्रीलाई अंकमाल गरेको भारतीय सन्चारमाध्यमहरूले जनाएका छन् ।
विपक्षी दल कंग्रेसले उक्त प्रस्ताव दर्ता गराएसँगै संसद चल्न नदिने भन्दै संसदमा अवरोध पनि गरेको छ ।
सो अवरोधप्रति असन्तुष्टि जनाउँदै प्रधानमन्त्री मोदीले संसदको काम–कारबाहीलाई अवरुद्ध नगर्न आग्रह गरेका थिए ।
शुक्रबार बिहान ट्वीट गरेर उनले संसदीय कामकाज सुनिश्चित गर्न दिन राजनीतिक दलसँग आग्रह गरेका थिए ।
यो संसदको वर्षे अधिवेशन भएकाले यसले कानुन निर्माणदेखि अरू धेरै काम गर्नुपर्ने भएकाले अवरोध गर्न नहुने प्रधानमन्त्री मोदीको जिकिर थियो ।
उनले सरकार कुनैपनि दलले उठाएका जुनसुकै विषयमा पनि छलफल गरी त्यसबाट समाधान निकाल्न तयार भएको भन्दै संसद चल्न दिन आग्रह गरेका थिए ।