महिलाहरुलाई मन्दिर प्रवेश निषेध गरेको विरोधमा भारतमा ६२० किमी लामो मानवसाङ्गलो
प्रकाशित मिति : पुस १८, २०७५ बुधबार
भारतको दक्षिणी राज्य केरलामा एक मन्दिरमा प्रवेश गर्न नदिएको विरोधमा लाखौँ महिलाहरुले सयौं किमी लामो मानव साङलो बनाएका छन् । राज्यमा अवस्थित हिन्दूहरुको पवित्र धार्मिक स्थल सावरीमाला मन्दिरमा महिलाहरुलाई प्रवेश गर्न निषेध गरेको विरोधमा एक्यवद्धता जनाउन मानव साङ्गलो बनाइएको हो ।
सेप्टेम्बरमा भारतको सर्वोच्च अदालतले मन्दिरमा महिलाहरुको प्रवेश निषेधलाई असंवैधानिक ठहराएको थियो । सयौं वर्षदेखि मन्दिरमा १० देखि ५० वर्ष उमेरका महिनावरी भएका महिलाहरुलाई प्रवेश निषेध छ ।
तर, धार्मिक कट्टरपन्थीहरुले भने अदालतको फैसलालाई कार्यन्वयन गर्न अवरोध गरिरहेका छन् । त्यहाँको सर्वोच्च अदालतमा उसले सेप्टेम्बरमा गरेको फैसलालाई पुनर्विचार गर्न एक मुद्दा पनि परेको छ । सो सम्बन्धमा अदालतले अर्को महिना सुनुवाई गर्दैछ ।
मंगलबार केरलामा त्यहाँको राज्य सरकारकै पहलमा ‘महिला पर्खाल’ निर्माण आयोजना गरेको थियो । मानव साङ्गलो १५ मिनेट समय कायम राखिएको थियो ।
उक्त विरोध प्रदर्शनका सार्वजनिक भएका फोटोहरुमा राज्यका मुख्यमन्त्री पिनरायी विजयान र स्वास्थ मन्त्री के के शिलाजा पनि सहभागी भएको देखिन्छ । साथै मानव–पर्खालमा उभिएका हजारौँ महिलाहरुले हात र मुठ्ठी उठाएको देख्न सकिन्थ्यो ।
गत सेप्टेम्बरको सर्वोच्च अदालतको फैसला मन्दिर प्रवेश गर्न पाउनुपर्ने महिला अभियानकर्मीहरुको दशकौँ लामो संघर्षको प्रतिफल थियो ।
महिला प्रवेशमा रहेको बन्देजलाई सन् १९९१ अगष्टमा पहिलो पटक केरला उच्च अदालतमा चुनौती दिइएको थियो । उक्त समयमा अदालतले मन्दिरमा प्रवेश गर्नेबारेको अन्तिम निर्णय मन्दिरका पुजारीको हुने फैसला गरेको थियो ।
सुनको छानोयुक्त साबरीमाला मन्दिरमा भगवान आयाप्पाको पुजा हुन्छ । उनलाई उचाईको देवाता मानिन्छ ।
ठाडो उकालो चढेर पुगिने डाँडाको टुप्पोमा रहेको मन्दिरमा प्रत्येक वर्ष हिन्दूहरुको ठूलो तिर्थ लाग्ने गर्छ । तिर्थको बेला करोडौँ हिन्दू धर्मावलम्बीहरु मन्दिर पुग्ने गर्छन् ।
महिलाहरुको प्रवेशको विरोध गर्नेहरुले आयाप्पन ब्रम्हचर्य भएकाले महिनावारी भएका महिलाहरुको प्रवेश गर्नु उचित नहुने बताउँछन् । केही भने तिर्थाटनको लागि आवश्यक ४१ दिनको कठोर तप महिलाहरुले गर्न नसक्ने बताउँछन् ।
भारतका प्रधानमन्त्री नरेन्द्र मोदी महिलाहरुलाई मन्दिर प्रवेश गर्न दिन नहुने रुढीवादीहरुको पक्षमा देखिएका छन् । जनवरी १ मा समाचार एजेन्सी एएनआईलाई दिएको अन्तवार्तामा उनले केही मन्दिरहरुमा पुरुषहरुलाई पनि प्रवेश निशेध रहेको कुरा पनि ख्याल गर्न भने । तर उनले त्यस्ता मन्दिरहरुको उदाहरण दिएनन् ।
मोदीको पार्टी भाजपाले पनि सर्वोच्च अदालतको निर्णयको विरोध गरेको छ ।
भाजपाका अध्यक्ष अमित शाहले मन्दिर प्रवेश गर्न हुने नहुने बहसलाई विश्वास लिएका मानिसहरु र केरलाको दमनकारी सरकारबीचको द्वन्द्वको रुपमा व्याख्य गरे । केरलामा भारतीय कम्युनिष्ट पार्टी(माक्र्सवादी)को सरकार छ ।
केन्द्रको शासन गरिरहेको भाजपाले भने स्थापना कालदेखिनै हिन्दूत्वलाई आफ्नो राजनीतिको सिद्धान्तको रुपमा लिएको छ । पार्टीका केही अतिवादी प्रतिनिधिहरुलाई त मुसलमानविरोधीको आरोप लाग्ने गर्छ ।
Ratopati