गोलीकाण्ड : क्यालिफोर्नियामा एकैघरका ५ को हत्या, एकबालकमात्र जिवित
प्रकाशित मिति : कार्तिक ३०, २०७६ शनिबार
शनिबार विहान सान डिएगो प्याराडाइज हिल क्षेत्रमा भएको गोलीकाण्डको अनुसन्धान भइरहको प्रहरीले जनाएको छ । विहान ७ बजे घटनास्थलमा प्रहरी पुग्दा ६ जनामाथि गोली लागेको पाइएको थियो जसमध्ये ५ जना मृत अवस्थामा रहेका थिए ।
मृतकमध्ये तीनजना केटाकेटीहरु रहेको बताइएको छ । घटनाको जानकारी पाएको एकमिनेटभित्रै प्रहरी पुगेको थियो । अगाडिको ढोकाबाट कुनै रेस्पोन्स प्राप्त नभएपछि प्रहरीले पछाडिको झ्यालबाट भित्रको दृश्य हेर्दा एकजना बालक रगतमा लतपतिएको देखेको थियो ।
त्यसपछि झ्याल तोडेर भित्र छिरेको प्रहरीले ६ जनामाथि गोली लागेको फेला पारेको थियो । घटनास्थलमा ३१ बर्षका पुरुषको टाउकोमा गोली लागेको अवस्थामा मृत भेटिएका थिए । त्यस्तै महिला र उनको ३ बर्षको बच्चा पनि मृत भेटिएका थिए ।
५ र ९ बर्षका दुईजना बच्चालाई अस्पताल लगिएको थियो । उनीहरुको उपचारका क्रममा मृत्यु भएको थियो । अर्का एकजना ११ बर्षीयको भने अस्पतालमा उपचार भइरहेको छ । घटनास्थलबाट एउटा हातेबन्दुक बरामद भएको छ । घटनामा संदिग्ध व्यक्ति मृतकमध्ये एकजना रहेको हुनसक्ने प्रहरीले आशंका गरेको छ ।