झण्डा, लाखे, स्वस्तीवाचनसहित अमेरिकाको थ्यांक्सगिभिङ परेडमा सहभागी हुँदै नेपाली
प्रकाशित मिति : मंसिर ६, २०७६ शुक्रबार
अमेरिकाको थ्यांक्सगिभिङ परेडमा पहिलोपटक नेपालको झण्डा फहराइने भएको छ । नोभेम्बर २३ तारिख शनिबार मेरिल्याण्ड राज्यको सिल्भरस्प्रीङमा हुने थ्यांक्सगिभिङ परेडमा नेपालको झण्डा फहराउँदै नेपालीहरुले सहभागिता जनाउने भएका छन् । त्यसका लागि तयारी पूरा भएको छ ।
मोन्टगोमरी काउन्टीको आयोजनामा हुने उक्त परेडमा पण्डितहरुबाट स्वस्ती वाचन हुनेछ भने अष्टलक्ष्मी र लाखे नाच प्रदर्शन, नेपाली मौलिक बाजागाजासहित नेपालीहरुको सहभागिता रहनेछ । नेपाली झण्डा र नेपाल भ्रमण वर्ष २०२० को टिसर्टसहित नेपालीहरु सहभागी हुनेछन् ।
५० हजारभन्दा धेरैको सहभागिता रहने उक्त बार्षिक परेडमा सयौं नेपालीहरुको सहभागिता हुने अपेक्षा गरिएको छ । शनिबार विहान १० बजेदेखि सुरु हुने उक्त परेडमा सहभागिता जनाउन चाहने नेपालीहरु ९ बजे सिल्भरस्प्रीङको भेट्रान प्लाजामा पुग्नसक्नेछन् । नेपाली पहिचान र नेपाली पर्यटनको प्रवद्र्धनका लागि उक्त परेडमा नेपालीहरुले सहभागिता जनाउन लागेका हुन् ।
थ्यांक्सगिभिङ परेडमा पहिलोपटक नेपालीहरुले सहभागिता जनाउन लागेको बताउँदै मेरिल्याण्डका व्यवसायी लोक तिवारीले नेपालीको सहभागिताबाट स्थानीय सरकारमा नेपालीको उपस्थीतिका बारेमा ज्ञान हुनेमात्र नभई परेडमा उपस्थीत हुने पचासौं हजारका अगाडि नेपाल कला, संस्कृति प्रस्तुत गर्दा नेपालको पहिचान र पर्यटन प्रवद्र्धनमा योगदान पुग्ने बताउनुभयो ।
१ सय भन्दा धेरै कलाकारहरुको प्रस्तुती रहने परेडमा १२ फुटको हावाले भरिएको पेंगुईन, १२ फुटको हावाले भरिएको डायनोशर, स्कुल कलेजका व्यवसायिक मार्चिंग ब्याण्डहरु, सुन्दरीहरु, जोकरहरु सामेल रहने जनाइएको छ । परेडमा ठूलो भींड हुने भएकाले र पार्किङको समस्या हुने भएकाले सहभागीहरुलाई सिल्भर स्प्रींग स्टपसम्म मेट्रो रेड लाइन चढेर आउन सुझाव दिइएको छ ।
परेडको विभिन्न अमेरिकन टेलिभिजनहरुले प्रत्यक्ष प्रशारण गर्नेछन् । परेडमा उच्चतहका अमेरिकन राजनीतिज्ञहरु, सांसदहरु, स्थानीय सरकारका प्रतिनिधिहरु सहभागी हुने जनाइएको छ ।