अष्ट्रेलियामा नेपाली दम्पत्तिबीच हानाहान, रुपन्देहीका सन्तोष गौतमको मृत्यु, श्रीमती हिराशतमा
प्रकाशित मिति : मंसिर ७, २०७६ शनिबार
अष्ट्रेलियामा नेपाली दम्पत्तिबीच हानाहान हुँदा श्रीमानको मृत्यु भएको छ । उनीहरुबीच शनिबार बेलुका झगडापछि हानाहान भएको जनाइएको छ ।
ग्रान्सभिलको घरबाट फोन आएपछि बेलुका साढे ७ बजे प्रहरी घटनास्थलमा पुगेको थियो । घटनास्थलमा पुग्दा श्रीमान अचेत अवस्थामा थिए भने श्रीमती पनि घाइते अवस्थामा थिइन् ।
गम्भीर घाइते भएका श्रीमानलाई नजिकैको अस्पतालमा लगिएको थियो । अस्पतालमा उपचारका क्रममा उनका निधन भएको जनाइएको छ । मृत्यु हुने व्यक्ति रुपन्देहीका ३४ बर्षका सन्तोष गौतम रहेको जनाइएको छ । मृतक सन्तोषको टाउकोमा गम्भिर चोट लागेको थियो ।
घाइते श्रीमतीलाई पनि उपचारका लागि अस्पतालमा लगिएको थियो । तर उनको अवस्था भने सामान्य रहेको जनाइएको छ ।
उनीहरुबीच सुरुमा सामान्य विषयमा घरझगडा भएको र पछि हानाहानकै अवस्था आएको जनाइएको छ । घटनाबारे प्रहरीले थप अनुसन्धान गरिरहेको छ । तर घटना घरेलु हिंशासँग सम्बन्धित भएको आशंका गरिएको छ ।
उपचारपछि डिस्चार्ज गरिएकी ३४ बर्षकी श्रीमतीलाई पछि ग्रान्सभिल प्रहरीले नियन्त्रणमा लिएको छ । उनलाई आजै पारामाथा बेल कोर्टमा पेश गर्ने जनाइएको छ ।