नेपाली मुलकी अस्मिता इङ्लिस क्लब एस्टन भिल्लामा, शुक्रबार ब्यवसायिक सम्झौता
प्रकाशित मिति : मंसिर १३, २०७६ शुक्रबार
नेपाली मुलकी फुटबलर अस्मिता आले इङ्लिस प्रिमियर लिग क्लब एस्टन भिल्लामा अनुबन्ध भएर आफ्नो फुटबल यात्रा सुरु गरेकी छन् । पूर्व गोर्खा सैनिक अमृत आलेकी छोरी अस्मिताको पुख्यौली घर तनँहु दमौली हो ।
बेलायतमै हुर्किएकी अस्मिता सोही क्लबको एकेडेमीबाट खेल्दै आएकी थिइन् । उनलाई शुक्रबार क्लबले ब्यवसायिक सम्झौता गरेको हो । १८ वर्षीया अस्मिता आठ बर्षको उमेरदेखि एस्टन भिल्लाको एकेडेमीमा आबद्ध भएकी थिइन् । उनले उमेर समूहको हरेक खेलमा उत्कृष्ट प्रदर्शन गरेका कारण क्लबले अनुबन्ध गरेको बताइएको छ ।
व्यवसायिक फुटबल खेल्ने आफनो सपना रहेको सानैदेखि खेल्दै आएको क्लबमा व्यवसायिक रुपमा अनुबन्धित हुन पाउँदा खुशी लागेको उनको भनाई छ । अस्मिताले इङल्यान्डको यू–१९ राष्ट्रिय महिला टोलीबाट खेलिसकेकी छिन् । उनले युइएफए वुमन्स यू–१९ च्याम्पियनसिप छनोट खेल पनि खेलेकी थिइन् ।
यसैबीच एनआरएनए अध्यक्ष कुमार पन्तले इङ्लिस क्लब एस्टन भिल्लामा आवद्ध भएर व्यवसायिक फुटबलयात्रा आरम्भ गरेकोमा अस्मितालाई बधाई र शुभकामना दिएका छन् । पन्तले भनेका छन् – ‘तपाईको हरेक सफलतामा नेपाली डायस्पोरा गर्व गर्दछ ।’