नेपाल प्रहरीका डिएसपी कुमोद ढुंगेलविरूद्ध पक्राउ पुर्जी जारी
प्रकाशित मिति : मंसिर १८, २०७६ बुधबार
नेपाल प्रहरीका डिएसपी कुमोद ढुंगेलविरूद्ध पक्राउ पुर्जी जारी भएको छ।
काठमाडौं जिल्ला अदालतले आपराधिक क्रियाकलापमा संलग्न रहेको भन्दै ढुंगेलविरूद्ध बुधबार पक्राउ पुर्जी जारी गरेको प्रहरीले पुष्टि गरेको छ।
उनलाई गत वैशाखमा प्रहरी प्रधान कार्यालयले डकैती गर्ने समूहसँग साठगाँठ रहेको आशंकामा पदबाट निलम्बन गरेको थियो । काठमाडौंको रानीबारीका लालेन्द्र शेरचनको घरमा भएको डकैती गर्नेमध्येका विक्रम श्रेष्ठले डीएसपी ढुंगेलको मोबाइलमा सन्देश पठाउनुका साथै भेटघाट गरेको पाइएपछि उनी अनुसन्धानको घेरामा तानिएका थिए।
यसअघि पनि ढुंगेल विभिन्न आपराधिक घटनाका अभियुक्तसँग सम्पर्कमा रहने गरेको आरोप लागेको छ।
डिएसपी ढुंगेलले नेपाल निर्माण व्यवसायी महासंघका तत्कालीन अध्यक्ष शरद गौचन हत्याका मुख्य योजनाकार समिरमान सिंह बस्न्यातसँग समेत निरन्तर संवाद गरेको रहस्य यसअघि नै खुलेको छ।