अमेरिकाले दिएका दुई जहाज मध्यरात काठमाडौं अवतरण
प्रकाशित मिति : मंसिर २२, २०७६ आईतबार
अमेरिकाले नेपाली सेनाका लागि उपलब्ध गराएका दुईवटा स्काइ ट्रक शनिबार मध्यरातमा काठमाडौं अवतरण गरेका छन्। अमेरिकाले वैदेशिक सैन्य सहायता कार्यक्रम (एफएमएफपी) अन्तर्गत आपतकालीन उद्धारमा सघाउन नेपाली सेनालाई दुईवटा जहाज उपलब्ध गराइएको हो।
दुईवटा जहाज भारत हुँदै काठमाडौं विमानस्थलमा अवतरण गरेको जानकारी सैनिक प्रवक्ता सहायकरथी विज्ञानदेव पाण्डेले जानकारी दिए। पूर्वनिर्धारित तालिकाअनुसार आइतबार बिहान काठमाडौं अवतरण हुने कार्यक्रम रहे पनि अरु एयरपोर्टबाट उडान तालिकामा ढिलाइ नहुँदा राति नै काठमाडौं ल्याइएको हो।
विपद् व्यवस्थापन, आपतकालीन उद्धार तथा राहत सामग्रीको ओसारपसारका लागि यी जहाजको प्रयोग हुनेछ। दुवै जहाजको औपचारिक हस्तानान्तरण पुस २ गते हुनेछ।
अहिले दुवै जहाजलाई नेपाली सेनाको ११ नम्बर बाहिनीअन्तर्गतको ह्यांगरमा राखिएको छ। समान ढुवानी र सुरक्षाकर्मीको खटनका लागि प्रयोग हुने दुवै जहाज १८ यात्रु वा २३ सय किलो समान बोक्ने क्षमताका छन्।