बेनेलक्समा यसरी गरियो भ्रमण बर्षको सुरुवात
प्रकाशित मिति : पुस २४, २०७६ बिहीबार
नेपाली दूतावास ब्रसेल्सले औपचारिक रुपमा नेपाल भ्रमण बर्ष २०२० को सुरुवात गरेको छ । ब्रसेल्सको सोफिटेल होटलमा आयोजित कार्यक्रममा विशेष कार्यक्रमको आयोजना गरिएको थियो ।
बेल्जियम, नेदरल्याण्ड र लक्जेम्बर्ग अर्थात् बेनेलक्स क्षेत्रका लागि नेपाली राजदूत लोकबहादुर थापाको विशेष पहलमा विदेशी पाहुनाहरुलाई कार्यक्रममा उपस्थीत गराइएको थियो । युरोपियन युनियनका लागि समेत नेपाली राजदूत थापाले त्यस क्षेत्रमा विगत लामो समयदेखि नेपाली पर्यटन प्रवद्र्धनका लागि उल्लेख्य पहल गर्दै आएका छन् ।
कार्यक्रममा युरोपियन संसद सदस्यहरुको उल्लेख्य उपस्थीति रहेको थियो भने बेल्जियमका सरकारी अधिकारीहरु, युरोपियन कमिसनका उच्च अधिकारीहरु, राजदूतहरु, कुटनीतिक निकायका सदस्यहरुको उपस्थीति रहेको थियो । त्यस्तै बौद्धिक समुदाय, संचारकर्मीहरु, फोटोपत्रकारहरु, यात्रासम्बन्धि लेखकहरु, विभिन्न एयरलाइन्सका प्रतिनिधिहरु, सामाजिक कार्यकर्ताहरु, विभिन्ने नेपाली संघ संस्थाका प्रतिनिधिहरुमाझ भ्रमण बर्षको सुरुवात गरियो ।
बेल्जियम, नेदरल्याण्ड र लक्जेम्बर्गका क्षेत्रका पर्यटकहरु नेपाल भित्राउने उद्देश्यले उक्त क्षेत्रमा भ्रमणबर्षको कार्यक्रम गरिएको हो । दक्षिण एसियाका राष्ट्रहरुसँगको सम्बन्धका लागि युरोपियन संसदका प्रतिनिधिमण्डका अध्यक्ष बारोनेस नोशीना मोबारिक, युरोपियन एक्स्टर्नर एक्सन सर्भिसका डेपुटी सेक्रेटरी जनरल, बेल्जियमको सिन्ट निकालस सिटीका मेयर लगायतले कार्यक्रममा सम्बोधन गरेका थिए ।
कार्यक्रममा नेपालको सौन्दर्यताका भिडियोहरु देखाइएको थियो भने नेपाली कला संस्कृति समेत प्रदर्शन गरिएको थियो । कार्यक्रमकै एउटा भागका रुपमा फोटो प्रदर्शनी समेत गरिएको थियो ।
