न्युयोर्कको डी ट्रेनमा भेटिए मृत होमलेस, शरीरभरी उडुस
प्रकाशित मिति : माघ ८, २०७६ बुधबार
न्युयोर्कमो डी ट्रेनमा एकजना होमलेस व्यक्ति मृत अवस्थामा भेटिएका छन् । मंगलबार राती कोलम्बस सर्कल स्टेशनमा ट्रेनभित्र भेटिएका ती व्यक्तिको शरीरभर उडुस भेटिएको थियो ।
ती व्यक्ति अपटाउन ट्रेनको सिटमा बसिरहेका थिए । जब अन्य यात्रुले ती व्यक्ति नचलेको थाहा पाए, तब प्रहरीलाई खबर गरेका थिए ।
ती व्यक्ति कतिवेलादेखि मृत थिए भन्नेबारे केही खुलेको छैन । उनको पहिचान पनि खुलेको छैन ।
प्रहरीले मृत्युको कारण प्राकृतिक नै रहेको विश्वास गरेको छ । कसैले हत्या गरेकोबारे प्रहरीले आशंका गरेको छैन ।
न्युयोर्कका टे्रनमा होमलेसहरु यात्रा गरिरहेको प्रसस्तै देख्न सकिन्छ । न्युयोर्क सिटीमा सन् २०१८ मामात्र २९० जना होमलेसको मृत्यु भएको थियो । जसमध्ये २३१ जना पुरुषहरु रहेका थिए ।