भारतीय पक्षबाट मिचिएको नेपाली भूभागको नक्सासहित आयो ‘पूर्व तिम्रो रस्तीवस्ती’
प्रकाशित मिति : फाल्गुन ९, २०७६ शुक्रबार
कालापानी र लिपुलेकमा भारतीय पक्षबाट मिचिएको नेपाली भूभागको नक्सासहित नेपाली राष्ट्रगीतको म्युजिक भिडियो सार्वजनिक भएको छ । कान्तिपुर नेशनल म्युजिक अवार्डमा उत्कृष्ट राष्ट्रगीतको अवार्ड जितेको पूर्व तिम्रो रस्ती बस्तीको म्युजिक भिडियो नेपालको सिमा मिचिएको मर्ममा आएको छ ।
गीतले नेपालीहरुबीच एकताको सन्देश दिदै भारतीय पक्षबाट भएको नेपाली भूमि अतिक्रमणको सांकेतिक विरोध समेत गरेको छ । भिडियोमा मिस्टर मोडल अफ द वल्र्ड २०१८ दिक्पाल कार्की, विभिन्न चलचित्रहरु र म्युजिक भिडियोमा अभिनय गरेकी कलाकार ऋचा थापा, चित्रकार तथा संगीतकार ज्योतिप्रकाश बिक, गायिका स्वयम् शीतल पाण्डे लगायतको अभिनय रहेको छ ।
भिडियोको निर्देशन याम गुरुङले गरेका छन् भने छायांकन दुर्गा पौडेलले गरेका छन् । गीतका गायक शीतल पाण्डे र निशान भट्टराई हुन् ।दिनेश अधिकारीको शब्द र सुरेश अधिकारीको संगीत रहेको गीतको एरेन्ज महाराज थापाले गरेका हुन् भने मास्टरिङ किशोर थापाले गरेका हुन् ।
गीतका रेकर्डिस्टहरु साजन शाह र राजेश श्रेष्ठले गरेका हुन् भने गीतको रेकर्ड काठमाडौंको पुतलीसडकमा रहेको ए वान म्युजिसिएनमा भएको हो ।
वाद्यवाधनमा ढोलक, तबला र मादलमा कुमार महाराज, बासुरीमा गोपालदेव घतानी, रिदम गितारमा संजिव बराईली, बेस गितारमा अनुप दास, सारंगीमा धर्म गन्धर्वले साथ दिएका छन् ।