स्पेन नेपाली एकता समाजले परराष्ट्र मन्त्री प्रदीप ज्ञवालीलाई ज्ञापन पत्र बुझायो
प्रकाशित मिति : फाल्गुन ११, २०७६ आईतबार
बार्सीलोना / स्पेन नेपाली एकता समाजले परराष्ट्र मन्त्री प्रदीप ज्ञवालीलाई ज्ञापन पत्र बुझाएको छ ।
जेनेभाको एक कार्यक्रममा भाग लिन स्वीजरल्याण्ड जाने क्रममा स्पेनको बार्सिलोलामा आयोजित एक अन्तरक्रियामा सहभागी मन्त्री ज्ञवालीलाई एमसीसी सम्झौता खारेजीको मागसहितको ज्ञापनपत्र बुझाइएको हो । स्पेन नेपाली एकता समाजका अध्यक्ष दुर्गा शर्माको नेतृत्वमा रहेको एक प्रतिनिधिमण्डलले मन्त्री ज्ञवालीलाई ज्ञापनपत्र बुझाएको हो ।
एमसीसी सम्झौता र नेपाली कानुन बाझिएमा एमसिसी सम्झौता लागू हुनेछ र बाझिएको हदसम्म नेपाली कानुन निस्क्रिय हुनेजस्ता गम्भीर खालका प्रावधान राखिएकाले उक्त सम्झौता खारेजीको माग राखिएको ज्ञापनपत्रमा उल्लेख छ ।
कार्यक्रमको खर्चको अडिटिङ अमेरिकी संस्थाले मात्र गर्ने जस्ता आपत्तिजनक र राष्ट्रघाती प्रावधानहरु कुनै पनि स्वाभिमानी नेपाली र स्वाधीन राष्ट्रका लागि स्वीकार्य हुन नसक्ने भन्दै खारेजीको माग गरिएको छ ।
यसैगरी समाजले देशमा भ्रष्टाचारको अवस्था भयावह बनेको जनाएको छ । समाजले देशमा हुने उन्नती र प्रगतिमा मात्र प्रवासी नेपाली खुशी हुन सक्छन् भन्दै देशमा अनियन्त्रितरुपमा बढ्दै गइरहेको भ्रष्टाचार रोक्न माग गरेको छ ।
ज्ञापनपत्रमा भनिएको छ– ‘विदेशीसँग हात थापेर आउने रकम जति नै ठूलो भएपनि त्यसले गुणात्मक फड्को मार्न सक्दैन ।’
समाजले एनसेल लगायतका विभिन्न संस्थाले कर छली गरेको रकम असुलउपर, विद्युत प्रसारण लाइन, यातायात जस्ता भौतिक पूर्वाधारका कार्यक्रममा लगानी गर्न समेत आग्रह गरेको छ ।
स्वदेशमा रोजगारी नहुँदा नेपालीहरू विदेशिन बाध्य भएका लाखौं नेपालीलाई नेपालमै रोजगारी सिर्जना गर्र्न नेपालमै फर्किएर आफ्नो सीप, श्रम र क्षमता प्रयोग गर्ने वातावरण निर्माण गर्न समेत सरकारलाई माग गरेको छ ।
