न्युयोर्कमा आइतबारदेखि प्लास्टिक झोला प्रतिबन्ध, किनमेलमा जाँदा घरैबाट झोला लैजान सुझाव
प्रकाशित मिति : फाल्गुन १५, २०७६ बिहीबार
न्युयोर्कमा राज्यब्यापी रुपमा आगामी मार्च १ देखि ग्रोसरी स्टोरहरु, रेष्टुरेण्ट र अन्य व्यापार व्यवशायमा प्लास्टिकको झोला प्रयोगमा प्रतिबन्ध लगाइएको छ । अर्थात् मार्च १ पछि किनमेल गर्न जानेहरुले सामान राख्नका लागि आफ्नो झोला लिएर जानुपर्नेछ ।
कतिपय स्टोरहरुले प्लास्टिकको झोलाको साटो कागजको झोला अफर गर्न त सक्नेछन् तर त्यसका लागि शुल्क तिर्नुपर्नेछ । न्युयोर्कमा हरेक बर्ष १० बिलियन प्लास्टिक झोलाहरु प्रयोग हुँदै आएको तथ्यांक छ । प्लास्टिकको प्रयोग कम गर्न यो नियम ल्याइएको हो ।
कागजको झोला अफर गर्ने स्टोरहरुले ५ सेन्ट शुल्क लिने जनाइएको छ । यो शुल्कको २ सेन्ट स्थानीय सरकारमा जानेछ भने ३ सेन्ट वातारण संरक्षण कोषमा जम्मा हुने जनाइएको छ ।
कतिपय स्टोरले कागजको झोला समेत नदिने भएकाले ग्राहकले आफैले झोला लिएर जानुपर्ने सुझाव दिइएको छ । तर मासुहरु पोको पार्न, फोहोर राख्न वा अन्य त्यस्तै प्रयोजनका लागि भने प्लास्टिकको प्रयोग हुनसक्नेछ ।
यो नियमबाट ग्रोसरी स्टोरहरुदेखि अन्य खुद्रा स्टोरहरु पनि प्रभावित हुनेछन् । न्युयोर्क सिटीको सेनिटेशन डिपार्टमेन्टले पुन प्रयोग गर्न मिल्ने झोलाहरु निशुल्क वितरण गरेको छ ।