कोरोना : इटालीमा १ सय ९७ जनाको मृत्यु
प्रकाशित मिति : फाल्गुन २४, २०७६ शनिबार
इटालीमा कोरोनाभाइरसका कारण मृत्यु हुनेको सङ्ख्या इटलीमा १ सय ९७ पुगेको छ । भाइरसको संक्रमण सुरु भएयता सङ्क्रमण हुनेको सङख्या एक दिनमै धेरै बढेपछि मृत्यु हुनेको सङ्ख्या १ सय ९७ पुगेको हो।
अधिकारीहरूका अनुसार गत २४ घण्टामा मात्रै ४९ को मृत्यु भएको छ । कुल सङक्रमण हुनेको सङ्ख्या अहिलेसम्म ४६ सयभन्दा बढी पुगेको छ । डिसेम्बरमा भाइरस पहिलोपटक देखिएयता चीनबाहिर सबभन्दा धेरै मृत्यु हुनेको सङ्ख्या हुने देश इटाली बन्न पुगेको छ।
विश्व स्वास्थ्य सङ्गठनले विश्वव्यापी रूपमा कोरोनाभाइरसबाट करिब १ लाख मानिस सङ्क्रमित भएको जनाएको छ । विश्व स्वास्थ्य सङ्गठनका महानिर्देशक टेड्रो एड्हानोम गेहब्रेयससले भाइरसको सङ्क्रमण गहिरो चिन्ताको विषय भएको भन्दै यसको रोकथामलाई उच्च प्राथमिकतामा राख्न सबै देशहरूलाई अपिल गरेका छन्।
इटालीलाई अधिकारीहरुले शुक्रवार एक विज्ञप्तिमार्फत् दैनिक मृत्यु हुनेको सङ्ख्या सबैभन्दा बढी पुगेको घोषणा गरेका छन् । उनीहरूले स्वास्थ्य अधिकारीहरूले मृत्युको यकिन कारण नभन्दासम्म मृत्यु हुनेको उक्त सङ्ख्या पुष्टि गर्न नसकिएको बताएका छन् ।
राष्ट्रिय स्वास्थ्य निकायले मृत्यु हुनेको औसत आयु ८१ रहेको र उनीहरूमध्ये धेरैमा पहिल्यै अन्य स्वास्थ्य समस्या पनि रहेको जनाएको छ । मृत्यु हुनेमध्ये ७२ प्रतिशत पुरुष रहेको पनि जनाइएको छ । सरकारी तथ्याङ्क अनुसार कोरोनाभाइरस देखिएका ४ दशमलव २५ प्रतिशतको मृत्यु भएको पुष्टि भएको छ जुन विश्वमा उच्च दर हो ।