हलिउड अभिनेत्री कोरोनाबाट संक्रमित
प्रकाशित मिति : चैत्र ३, २०७६ सोमबार
हलिउड अभिनेत्री ओल्गा कर्लेन्को कोरोना भाइरसबाट संक्रमित भएको पुष्टि भएको छ । ‘क्वान्टम अफ सोलेस’ कि अभिनेत्रीले आफू भाइरसबाट संक्रमित भएको भन्दै इन्स्टाग्राममा पोस्ट गरेकी थिइन । कर्लेन्को घरमै आइसोलेसनमा छिन् ।
‘कोरोना भाइरसको संक्रमण भएको पुष्टि भइसकेपछि म घरमै बसिरहेकी छु, म एक हप्तादेखि ज्वरो र थकानले ग्रसित थिएँ, तपाईहरु आफ्नो ख्याल गर्नुहोस् र यसलाई गम्भीरतापूर्वक लिनुहोस् ।’ उनले इन्स्टाग्राममा लेखेकी छन् ।
युक्रेनमा जन्मिएकी अभिनेत्री कोरोना संक्रमित प्रशिद्ध व्यक्तिहरुको सूचीमा समावेश भएकी छन् । यी बाहेक हलिउडका दुई दम्पती टम ह्यांक्स र रिता विल्सन, क्यानडियन प्रधानमन्त्री पत्नी सोफी, युनिर्भसल म्युजिकका सिइओ लुसियन ग्रेनगे कोरोना संक्रमणपछि उपचारका लागि अस्पताल भर्ना भएका छन् ।
विश्वव्यापी रुपमा फैलिएको कोरोना भाइरसको महामारीका कारण बलिउड र हलिउडमा पनि धेरै असर पुगेको छ । विश्वका धेरै देशहरुमा सिनेमाघरहरु बन्द छन्, सुटिङहरु रोकिएका छन् ।