कोरोना भाइरसको संक्रमण देखियो वा शंका लाग्यो, तर स्थीति सामान्य नै छ, के गर्ने ?
प्रकाशित मिति : चैत्र ८, २०७६ शनिबार
कोरोना भाइरसको रोकथामका लागि अहिलेसम्म कुनै औषधी पत्ता लागेको छैन । तर कोरोना भाइरसको संक्रमण भएमा स्वासप्रश्वास प्रणालीमा असर पर्ने भएकाले स्वास फेर्नका लागि सहज हुने उपायहरु अपनाउनुपर्छ । ८० प्रतिशत बिरामीहरु कुनै विशेष उपचारविना नै निको हुने गरेको विश्व स्वास्थ्य संगठनले जनाएको छ । तर बुढाबुढी, पहिले नै स्वास्थ्य समस्या भएकाहरुलाई कोरोना संक्रमणबाट स्थीति गम्भिर हुने र मृत्यु समेत हुने गरेको छ ।
विश्व स्वास्थ्य संगठनले कोरोना भाइरस संक्रमणका सामान्य लक्षण देखिएको खण्डमा घरमै बस्न सुझाव दिएको छ । सामान्य लक्षण देखिएकाहरुलाई निको नहुन्जेल घरमा बस्न सुझाव दिइएको हो ।
प्रयाप्तमात्रामा आराम गर्न र सुत्न सुझाव दिइएको छ । त्यस्तै आफूलाई न्यायो राख्न र प्रयाप्तमात्रामा तातो झोल पदार्थ पिउन सुझाव दिइएको छ । त्यस्तै तातोपानीले नुहाउन सुझाव दिइएको छ ।
चिकित्सकहरुले कोरोना संक्रमणको लक्षण देखिएका बिरामीहरुले बु्रफेन वा एन्टीवायोटिक औषधी प्रयोग नगर्न सुझाव दिएका छन् । कतिपय चिकित्सकले सामान्य ज्वरो र टाउको दुखाईको अवस्थामा पारासिटामोल वा टाइलानोल प्रयोग गर्न सुझाव दिएका छन् ।
यदि ज्वरो नघटेमा, खोकी लागेमा, स्वास फेर्न गाह्रो भएमा तत्कालै स्वास्थ्य उपचार लिन सुझाव दिइएको छ । तर स्वास्थ्यकर्मीलाई पहिले नै फोन गरेर जानकारी दिन सुझाव दिइएको छ ।
आफूलाई कोरोना संक्रमण भएमा वा भएको आशंका लागेमा सामान्य लक्षणहरु देखिएको अवस्थामा घरभित्र बसेर स्वास्थ्यलाभ गर्न सकिन्छ । यस्तो अवस्थामा घरबाहिर जाँदा अरुमा संक्रमण बढ्ने भएकाले घरबाहिर नजान सुझाव दिइएको छ ।
त्यस्तै आफूलाई कोरोना संक्रमणको कुनै लक्षण नदेखिएको खण्डमा पनि घरबाहिर नजान सुझाव दिइएको छ । किनभने घरबाहिर जाँदा संक्रमितबाट आफूलाई संक्रमण हुने खतरा भएकाले यस्तो सुझाव दिइएको हो ।
